感謝評審，得獎真歡喜。

感謝阿姊，獎金送分佢。

感謝自家，不老个心。

現職：國小老師

　　一个人生活當中，時時會摎外背个世界，摎自家个內心進行等「對話」。對話當中，「語言」係表達心聲最重要个工具，毋過在頭擺禁止方言个時代，講自家个阿姆語講到口涎波潑，別儕也話著你在該噥噥哢哢，無人聽得識；甚至有時因為一句話別人聽毋著，兩方嗄變作冤家泌背。好得這下有母語教育，有母語文學獎，做得大聲講自家个阿姆話，做得用自家最自然个母語思維來創作文學作品。

　　一直試著，現代社會恁亂，當大部分个原因係因為想法無共樣个雙方斯知在該「對立」，無知好來「對話」：兩公婆之間做得做情感、觀念个對話；「傳統」摎「創新」做歷史、時間个對話；「人為」摎「自然」做環境、空間个對話；兩黨之間也做得心平氣和，真心誠意坐下來做「藍綠」對話。有心對話个人，相互聽一下對方个心聲，就會發現其實二者之間無一定愛起衝突，其實當中做得尋出交流个所在。

　　對話代表尊重，代表多元，對話會在風風雨雨了後出現天弓，會在烏雲底下看著彩霞。希望生活在這片土地頂个人民，都做得用包容个大愛來化解人心个阻隔，做得換隻角度來看待這恁靚个臺灣世界。

現職：彰化師大臺文所副教授

　　首先愛感謝評審委員對𠊎个肯定，也感謝閩客語文學獎分𠊎个創作有展現个舞臺，𠊎對閩客語文學獎並無生份，在97年曾經用學老話投稿新詩，無定有人會問，為何會投學老新詩又投客語新詩呢？可能因為若爸係客家人，阿姆係學老人，分𠊎有這個榮幸摎機會同時學會學老話摎客家話，無論學老話或係客家話，對𠊎來說都有共樣个情感，毋係因為佢係毋係面臨絕種，單淨因為佢係𠊎个母語，阿公婆傳承下來个東西，就應該分佢延續落去。這擺得獎𠊎心肝肚當感激，並期望日後自家能有更加多个靈感、更加多个時間，創作更加多个母語文學。

現職：苗栗國中專任教師

　　得獎是一件很令人興奮的事情，寫在我手，看在我眼，詩中所呈現的景像，是大姊夫及大姊退休後運動的快樂農園，帶著感激及感動的心情，把感情訴諸於文字，特別是用自己的母語呈現，幸運的我，第一次投稿就得到這麼大的鼓勵，今後在創作上，信心大增，期許自己在客語文學創作的道路，努力耕耘，能夠大放異彩，謝謝各位評審。

現職：國立聯合大學客家語言與傳播所學生

　　這係𠊎第一擺用客話創作，也係𠊎第一擺參加閩客語文學獎，看著前幾年學生組得獎者，大部分係客家文化研究所个學生，感覺自家蓋像不自量力！毋過，屋下个人鼓勵𠊎分自家機會，分𠊎有勇氣來參加這擺个比賽。

　　當感謝主辦單位同評審委員个肯定，雖然還有盡多愛改進个所在，毋過用客話創作係一件當美好个事情！還愛感謝𠊎个阿公、阿婆，教𠊎客家話；感謝爺哀、阿姑同老妹个鼓勵支持！最尾，希望大家共下來加油，分母語文學創作緊來緊好！感謝大家。

現職：屏東商業技術學院商業自動化管理系三年級

　　感謝評審先生个厚愛，這擺有幸得獎。𠊎用客語文个書寫當一年四隻月，主要寫个係對家鄉个思念，在臺北讀書个生活，輒常想起家鄉个事務，故所用文字摎心肚个心情記錄下來。這篇〈落雨天〉係寫親情个故事，記得還細時節，阿姆總係用摩托車載𠊎摎老妹去讀書，就算落雨天乜共樣，坐在後背个𠊎只愛看著阿姆烏烏个頭那毛就會試著當安心，毋驚風雨。在異鄉个𠊎，想起頭擺个事情，乜發現阿姆个頭那毛多欸當多白毛，時間過忒恁久，兜細人仔乜挷想仔，毋管仰般，親情个味緒，還係囥到𠊎个心肚。

現職：臺北教育大學臺灣文化研究所學生

　　𠊎係學老人。感謝客家前輩个鼓勵，客家族群分𠊎个溫暖，甚至比𠊎自家阿姆話族群个還較大。

現職：臺師大臺文系博士候選人

　　感謝各位評審个肯定，你這兜个鼓勵係𠊎繼續用客話創作个動力。聽著得獎，心肚有兜仔激動。

　　「寧賣祖公田，不忘祖公言」，這係客家人長透掛在嘴脣皮个話，毋過，跈等時代个變化，網路个發達，當多做阿爸阿姆个人緊希望自家个細人跈欸著時代，煞猛喊細人仔讀英文、補習，故所所有个時間拿去讀書，平常時講無兩句話，變成這下个後生人全毋會講客話欸，連做爺哀个人自家也摎客話毋記得差毋多欸。

　　𠊎一降出來就戴在臺北，還細時節全毋曉得講客話。有一擺跈阿姆轉去大湖阿公个屋下，阿公看𠊎憨面憨面，聽無識佢這兜大人在講麼个，就罵吾姆：「客家人个子孫，仰毋會講客話？」後來，吾姆正遽遽教𠊎講客話。雖然這下𠊎會講客家話，但是當多純正、老古稽个用字還係毋恁曉得，識著當打爽，𠊎有一首詩表達心肝肚个遺憾。

<狗問花>

紅紅个安做大紅花

黃黃个安做日頭花

你問𠊎這係麼个花

實在應毋出

兩儕無相像

𠊎个祖先為著生活

頭犁犁仔煞猛耕田打林

做毋得換錢救命个花花草草

哪有恁閒去認識佢

故所

你問𠊎這係麼个花

實在講毋出名仔

又無想詐毋知

分人看毋起

𠊎只好回答你

這係狗問花

現職：公

　　在舊年正通過客語薪傳師个資格，開始用半生熟个客字來創作，這擺就做得著獎，愛感謝評審个鼓勵。

　　這首詩，係用一個客家人个想像摎觀點，將自家細細个時，對阿公阿婆頭擺生活个心情感受，用最簡單、直接个方式描寫出來，無用忒多花花草草个修辭，故所，會得到評審个注意摎欣賞，正經當歡喜，對客家語文創作這條路，增加當多信心，未來定著會還較煞猛打拚，繼續用客家語文來創作，乜愛感謝教育部對母語傳承个重視。

現職：新北市立深坑國中英語教師