母語，是族群的性命。每一个母語，攏是世界無法度替代的資產，若消失去，毋但是國家的悲哀，嘛是人類永遠的拍損。這馬，台灣各族群的母語攏面對滅亡的危機，向望咱政府珍惜多元文化，佇十二年國民教育體制內面，有計劃來進行母語保存、推廣的工程，毋通予下一代囡仔怨嘆佮遺憾──咱這代大人變做毀滅母語的兇手…..＜過城＞，主要欲探討的是，按怎超越人心內的彼个頑固的城，雖是無形，但是又閣如影隨形，共性命綴牢牢。其實，親像咱傳統的教育仝款，予一寡仔封建妖魔綁死死，母語文學教育，應當是一个突破的關鍵，先轉來性命的根，接續現代人過身去的感情，教育正常化的理想，凡勢仔就會佇爛塗面頂開花結籽。＜過城＞，是我第一篇較完整的台語散文，真歡喜獻予迷人的台南府城，感謝評審老師，牽成這个美麗的因緣。

現職：彰化縣立埔心國中教師

　　Puann lâi Tâi-tiong ê tē it tang, sin-thé kiám-tsa, hing-khám ū tsiò tiān-kong, kiám-tsa pò-kò kóng, hì-pōo oo-oo bô tshing-khì, koh ài tsìn-tsi̍t-pōo tui-tsong (guá bô teh tsia̍h-hun). Āu-âi，guá khì pīnn-īnn, kā i-sing kóng guá lâi khuànn-tsín ê guân-in, sīn-suà kā mn̄g kóng, guá sī ùi Hua-liân puann --lâi ê, sī m̄ sī in-uī Tâi-tiong khong-khì siunn lah-sap tsiah ē án-ne, sui-jiân i-sing kóng m̄ sī án-ne, m̄-koh guá sim-lāi khak-si̍t án-ne siūnn, nā-bô koh ū sím-mih guân-in?

　　Tsiâ mā m̄ sī bô hó, tsóng-sī lī tuā-hái siunn hn̄g. Tsái-khí khiâ khóng-bîng-tshia king-kè tuā-kau-á pinn, hiông-hiông phīnn tio̍h iū-á-hue ê phang-bī, ba̍k-tsiu tsiām-sî khueh--khí-lâi, koh siūnn-khí Kuān-tō 193 tshun-thinn-sî iân-lōo ê iū-á-hue-phang.

　　Lí-sióng kah hiān-si̍t sī ū kū-lî ê, siá bûn-tsiunn sī beh kì-liām í-king phah bô--khì ê kè-óng, kám-siā phîng-sím ê khíng-tīng. Nn̄g tang tsiah pān tsi̍t pái khak-si̍t sī phah-sńg, ta̍k tang pān ē khah hó-sè.

　　搬來臺中的第一冬，身體檢查，胸坎有照電光，檢查報告講，肺部烏烏無清氣，閣愛進一步追蹤（我無咧食薰）。後來，我去病院，共醫生講我來看診的原因，順紲共問講，我是對花蓮搬來的，是毋是為臺中空氣傷垃圾才會按呢，雖然醫生講毋是按呢，毋過我心內確實按呢想，若無閣有啥物原因？

　　遮嘛毋是無好，總是離大海傷遠。早起騎孔明車經過大溝仔邊，雄雄鼻著柚仔花的芳味，目睭暫時瞌起來，閣想起縣道１９３春天時沿路的柚仔花芳。

　　理想佮現實是有距離的，寫文章是欲紀念已經拍無去的過往，感謝評審的肯定。兩冬才辦一擺確實是拍損，逐冬辦會較好勢。

現職：臺中教育大學臺灣語文學系

　　寫完這篇氣味的記持我有淡薄仔躊躇，我知影這篇的結構分做二種，頭前是將幾若種的氣味kap起來寫，雖然也是記事不過以抒情為主，後面寫法差不多，不過干焦記一个故事，內容較拖沙，毋是上好的方法，不過有我上真的感情佇咧。寫這篇的背景是我拄好轉去彰化，行過留有阿姿跤跡的所在，我懷念阿姿佮伊無去的青春，就毋管三七二十一將這段往事攏保留起來。會當得獎實在足好運，我知影家己愛koh較拍拚咧，嘛佩服別人的進步佮精采。

現職：台南市立大灣高中教師兼導師

　　感謝阿母，感謝台語『sia̋n-pái』自古來以來ê拍拼。

　　借錦連『sia̋n-pái』 ê話：「Ta̍k-ê人lóng leh參與寫歷史，ta̍k-ê人lóng用bô-kâng ê款式ǹg伊生存ê世界做某1款發言。」創作tsiânn-tsò我釘根tī土地、kap社會tsò-hué tín-tāng ê發言款式，mā ǹg-bāng ùi hue-kô-kô ê歷史--nih tshiau-tshuē tsē-tsē 『sia̋n-pái』留--落-來ê「某1款發言」，koh tsiânn-tsò養分。

　　Tiānn leh想散文kap小說ê界線tī toh？Tsit篇是想了後ê實踐。

　　聽新聞放送，台語歌市場ta̍uh-ta̍uh-á拍開--a。若有影，tiā-tio̍h歡喜，總--是語言beh久長，文字、文學ê傳承mā是真要緊。教育部ê文學賞，thìng好tsiânn-tsò救應ê法度。不而過，tsit-pái文學賞，台語thái-ē kap福州話lām-tsham作伙比phēng？咱無hit款頭殼thang想有。

現職：台灣師範大學台灣語文學系 博士生

　　海豬仔真巧，上無，若講睏眠ê方式，in贏咱人太濟--leh！啊若著獎ê感言，就是希望會當好睏，tse算久年願--ah；設使講頭一个願無法度tsiânn，上無，希望法國詩人René Char講ê話實現：「詩是靠無了盡ê失眠活--落-去-ê。」（La poésie vit d'insomnie perpétuelle.）歹睏ê時，我希望會用得寫tsiok濟詩.....tsiok濟tsiok濟好詩.....

現職：學生

　　真久無攑筆寫文章，一直感覺應該將家己的故事記錄落來，真驚時間無等人，記持會一點一滴無去。這擺，將家己佮阿嬤的故事寫出來，算是紀念伊，嘛表達出我對伊的思念佮愛。

　　感謝評審予我的肯定，雖然真濟語詞久無用變生疏，但是用家己的母語記錄人生是真重要的代誌，未來的日子，我會繼續寫家己的人生故事。

現職：清華大學台灣教師研究所學生

　　台灣自1895年以來，分別遭受2个外來政權ê語言侵略，強制推行單一ê殖民「國語」政策。致使台灣本土語言，包括南島語、台語、客語，攏受著嚴重ê壓制佮傷害，甚至已經部份滅亡。

　　2001年起，台灣恢復佇全國各小學實施母語教學。雖然1禮拜kan-na上1節課niā-niā，毋過已經足有意義，算是值得呵咾ê好開始。

　　2008年，教育部以官方ê立場，首先開辦台灣母語文學獎徵文比賽；對台灣母語佮文學，是1个真大的鼓勵。為著表示支持，我每1屆攏以實際行動，寫作參賽，嘛幸運攏有得獎。

　　毋過，這个拄開始掖種，期待欲好好發芽、長大ê文學獎，煞對隔轉年2009開始，顛倒縮小跤步，改做每2年才舉辦1擺。

　　台灣母語長期受外來「國語」ê侵略、打壓，已經拋荒超過100冬矣。Tsit-má才重新欲辦理文學獎，短期間內，稿源當然會較少。也就是因為按呢，才愈需要由政府帶動，投入充足ê資源，積極、全面推捒。按呢，慢慢才會當看著成果。若2年才舉辦1擺全國性ê母語文學獎，這个冷灶，欲按怎熱會起--來?

　　向望、拜託教育部，趕緊改變策略，共這个台灣母語文學獎，恢復上少1年舉辦1擺。同時大量增加獎項名額佮獎金。用積極鼓勵ê方式，才會當有效提昇全民學習、寫作母語文學ê風氣。

　　另外，國小、國中甚至高中、大學，若會當全面加強母語教學，自然嘛會當促進母語寫作人口ê增加。

　　台灣母語佮文學長期失照顧，營養不良；需要教育部大力搶救。擴大辦理母語文學獎，是上經濟koh有效ê具體策略。期待真緊就會當看著教育部ê新行動；感恩。

現職：台語支援教師

　　首先，感謝教育部提供這个母語創作的文學舞台。會來參加這次比賽，主要是想欲訓練家己台語文寫作的能力，無疑悟會來得到評審老師的肯定佮鼓勵，實在是十二萬分感謝。向望以後有機會繼續寫出閣較好、閣較媠的作品，予閣較濟人來熟似佮欣賞真正是有夠媠的閩南語。

現職：生理人

　　我毋是台語界的人，我毋是臺文界的人。干焦希望順紲趁著錢，kā賞金提到手，袂koh予人設計、做掉就好。

現職：臺師大臺文系博士候選人