母語，是族群的性命。每一个母語，攏是世界無法度替代的資產，若消失去，毋但是國家的悲哀，嘛是人類永遠的拍損。這馬，台灣各族群的母語攏面對滅亡的危機，向望咱政府珍惜多元文化，佇十二年國民教育體制內面，有計劃來進行母語保存、推廣的工程，毋通予下一代囡仔怨嘆佮遺憾──咱這代大人變做毀滅母語的兇手…..＜愛的進行曲＞，雖然是個人的私情，但是真願意化作無私的大愛，關心咱的島嶼，咱的文化，咱的語言，咱的根。感謝評審老師，聽著我心內，輕輕迴轉的戀歌……

現職：彰化縣立埔心國中教師

　　原來，我會曉寫詩。從來毋敢數想會著教育部的文學獎，總是認為：寫詩是詩人tsiah寫會媠，我這个寫詩的菜鳥睏罔睏，mài陷眠。毋過，這毋是leh陷眠，更加毋是leh眠夢，這首＜予紅霞hiàm出帆＞，實實得著評審委員的肯定。感謝恁讀出這首詩的「美景」、「情意」、「矛盾」、「無奈」、「苦甘」kap「燒烙」，tō因為恁鼻著這首詩的芳氣，伊才會得見眾。

　　有人講：詩是思想kap文字的結晶。我beh加註的是：這首＜予紅霞hiàm出帆＞更加是我對生活的感動，內底的字字句句，攏是對心肝窟tsik--出來的血珠仔所疊起來的，我被生活感動，這馬，我予我家己的詩感動，更加有法度感動--人。

現職：國立屏東教育大學兼任講師

　　人講：「有唐山公，無唐山媽」，咱台灣大多數的人血脈內底，攏有「平埔」的印記。因為有平埔族的歷史，咱台灣的文化，才會更加豐富；也因為有平埔族的文化，我的詩句，才會使人感動。

　　所以，實在無應該將咱土地「母親」的歷史文化，排除佇歷史佮語文的教育之外，因為，伊已經是咱靈魂的一部份，咱無應該予囝孫，變成「有體無魂」的後一代……

現職：高雄市鹽埕國小教師

　　語言學家佮心理學家攏講：使用無仝的語言，就會造成咱對這個世界無仝的理解、無仝的看待。

　　我家己感覺這是真正的事實。因為我用台語寫作的時陣，對家己、對人生、對這个世界，就有愈濟無仝的體會。

現職：國立彰化師範大學國文系博士生

　　細漢中的記憶化作詩，一字一句……，希望有一日會當看見美麗的色水。

　　感謝評審對我的肯定，予我得等，日後會閣較拍拚、認真書寫，為台灣文學盡心，寫出阮的幸福。

現職：學生

　　真感謝各位評審的肯定，會使得著這个獎，對我來講是一个真大的鼓勵。

　　我寫這首詩的時陣，是真正有真深的感受，毋但是家己的生活經驗，予我有閣較濟靈感佮感動的，是看著阿公佮阿媽互相的關心，予我聽著怹無講出喙的心內話。這首詩有一部分是真的，毋過嘛有另外一部分是創造出來的。我的阿公、阿媽這馬攏猶真健康，但是年歲較大的人，是一定會想過後擺有可能發生的代誌，嘛一定捌經過驚惶的感受，自怹的對話、動作、眼神中，看得出毋甘離開佮放袂落的心情，就會予我想著：「總有一工，兩个人，會賰一个人，到彼个時陣，阮無法度改變啥物，只有勇敢去面對，佮繼續好好仔生活，才對會起離開的心愛的人，予伊放心，嘛予身軀邊其他關心家己的人，無免為著家己煩惱。甚至，閣較好的是會當用家己的力量，予別人感覺歡喜、安慰。」

　　相信真濟人攏有感受過「歲月咧反輾轉」的感覺，定定一目目聶 仔，就過規落冬矣。雖然性命就是會經過這个過程，但是對「時間咧過去、年歲愈來愈大」，嘛猶是濟少攏會有怨嘆，毋過人的一生遐爾仔長，袂永遠予鬱卒拍敗，總有共代誌看開的一工，按呢佇心內就會出現「想欲保護、珍惜猶佇身軀邊的所有」這種信念的堅持佮決心。

　　另外，寫作技巧方面，為著希望讀者唸這首詩的時陣，會感覺真順、真有畫面，我使用真濟「重疊」的手路，予這首詩感覺較活，嘛用真濟「比喻」的手路，予畫面看起來敢若真正咧發生的款。

　　毋過，上大的重點，猶是囥佇「感情」這个部分，希望所有的讀者嘛會共心內的思念佮回憶愈豉愈芳，上尾會成做「會牽絲的懷念」，永遠袂斷去。

現職：學生

　　感謝評審委員對「勇士」的肯定，予我有機會得著這个獎勵。我是正港的彰化囡仔，bat寫過現代詩「八卦山ê過客」，後來koh有寫「Siáu媽祖」刊tī台文通訊台文青年，創作的來源主要是生活周圍的靈感。彰化已經將5月28日定做是「賴和日」，賴和推動民主的決心是值得咱學習，所以這擺以賴和做主題，第一部分是寫日本對待台灣百姓採取懷柔kap鎮壓政策；第二部分是描述賴和對彰化百姓的關心kap照顧，民主自由的推捒；上尾仔是透過賴和的文章，現代人會當進一步了解hit當時的社會，真實記錄百姓鬱卒的生活。賴和是台灣民主啟蒙運動的先覺，所以我才會寫這首詩來宣揚伊的事蹟。

現職：彰化市南郭國小代課老師

　　自古以來「共患難易 同享福難」是一直予人感慨的宿命，不而過「革命尚未成功 同志已經反面」更加予人遺憾的心疼。

現職：台文筆會理事

　　異鄉遊子親像是一枝一枝蜂仔，直直飛，最終飛去佗位，猶原是，故鄉內一岫岫蜂仔炮城，永遠毋管空虛寂寞的日子如海湧一波一波濕澹著等待的夢……終有一日，遊子會回航。感謝我的故鄉──月津（鹽水）。感謝勉勵我寫出故鄉故事的朋友。感謝如燈塔引阮行過孤單風雨，親像故鄉長輩的神明文衡聖帝，一直攏佇武廟內，金金看著每一個離鄉打拼的囡仔。

現職：自由作家（筆名：跳舞鯨魚）