生活腳步緊湊的氛圍裡，一個人願意坐下來，將自己所看到的、聽到的、感受到的化成文字，既是情感的宣洩，也是自我的觀照，這是何等的賞心樂事！而今，還可用母語抒發個人所見、所聞、所想，真可攀登幸福的階梯。謝謝滋養我的土地，我的父母；謝謝評審的青睞，以及讀者你的閱讀。

現職：國中教師

　　第一擺參加教育部辦个文學獎比賽就得兩個獎，分𠊎當大个鼓勵，也分𠊎還較大个信心。

　　有機會做得在國教基層裡肚，參與客家文學創作、傳習係做先生个人最歡喜个事情，在這位𠊎愛感謝𠊎爺哀，分𠊎從細就有學習客家話个環境，今晡日正做得有機會用客語來寫文章。

　　〈一盒番火〉係一個真實个故事，文中有客家人惜子个溫暖摎對細人仔教育个堅持，也有客家人硬頸毋認輸个特性，希望藉這篇文章做得摎客家精神傳承下去。

現職：臺中市馬鳴國小教務主任

　　使得用自家个語言寫文章，盡感謝一路來鼓勵𠊎、指導𠊎个登志先生、玉蕉先生，還有共下研究教材个教授同好朋友，也愛感謝總係無條件支持𠊎个阿姆，十分勞瀝「閩客文學獎」，分𠊎這個鼓勵，用客語創作个路還當長，𠊎會認真行。

現職：苗栗縣苑裡鎮山腳國民小學教師

　　這篇文章係大前年去雪梨探望肖牛的二伯父愐著个想法，無想到，得獎个時節，二伯父既經過身，來毋掣看到，九十三歲个大伯父聽著𠊎得獎，愛𠊎寄分佢看，𠊎毋單淨要寄分大伯看，還要請大伯講古，續來煞猛用客家話寫加多，𠊎兜驚怕會毋記得，下一代可能完全毋知个祖輩故事。

現職：新竹教育大學臺灣語言與語文教育研究所碩士班二年級生（臺北市麗山高中教師）

　　這篇係用吾妹仔兩子阿婆个感情做題材个文章，佢兩儕个感情好到無話講，分𠊎盡感心。𠊎輒輒會提醒細人仔：「百善孝為先」，細人仔講阿婆聽得識个話，係最簡單个有孝方式，因為感情愛好，定著愛靠話語去溝通。故所佢做得用滑溜个客家話同厥婆打嘴鼓，從厥婆學習客家料理个孔竅，陪厥婆去菜園、去圳溝洗這洗該，跈在厥婆脣𢯭手，歸日仔阿婆長、阿婆短，厥婆就盡歡喜、試著盡奢鼻了。

　　為著記錄阿婆个話，兩個妹仔讀國中个時節就會寫客語漢字、會客語拼音了。該央時，全國正14個學生仔通過中高級个客語能力認證，佢兩儕就係其中个兩位，分𠊎試著感心个係，佢兩儕都係完全無「特別準備」就考著个，印證了——客語毋係特別學來个，係平常時就愛多聽、多講、多讀、多寫。愛細人仔開口講客家話，做人爺哀个，日常生活就愛用客家話同佢兜講。

　　原旦，想鼓勵佢兜寫文章投稿个，毋過，實在係因爭升學考試、為著學校課業較無閒，𠊎正代筆將𠊎平常時看著个、將佢个想法同感覺用个客語漢字寫出來，賭彩投稿看哪，實在無想著會得獎，得獎，對𠊎三子哀來講，係一種十分大个鼓勵。

現職：亞太創意技術學院職員、聯合大學客傳所研究生

　　𠊎得獎欸！𠊎寫「蹀蹀」得獎欸！

　　這篇文章个主旨係描寫做阿姆个心情，𠊎用吾倈仔个志業做「話頭」，引出主題「蹀蹀」──，將「助人」「頭路」比論世大人掌等「學行」个細人仔該種箬箬削削，愛「𢯭手」也係「放手」？心肝頭「吊等七八隻水桶」个心情。

　　在時間項，從吾細人仔「對歲」到「兩十零歲」，再回想自家「細細仔」該下，聚概有四五十年个光陰，穿來流去；「主軸脈絡」係「路」：從「細人仔學行路」到哀仔个觀念，講「蛇有蛇路」、「行行出狀元」个「頭路」───。

　　裡肚還有一個囥等个對照：到底爺哀愛仰仔對待細細人仔？愛仰仔管酌大細人仔？轉骨變大人欸又愛仰仔？三代个親子關係又係仰仔？這定著係各家唸毋忒、寫毋煞个經。𠊎想這篇文章係吾修整同心理療癒，疏通欸𠊎摎家官家娘个肚皮，燒暖欸𠊎摎滿子个「疏離」，還聯絡欸吾兄弟姊妹仔个感情。

　　𠊎得獎欸！承蒙客家前輩堅持行出一條客語創作个細路，承蒙評審先生了解吾用心，分𠊎肯定！承蒙吾歸屋下人有恁多醹情蜜意个微毛末節好分𠊎寫！當然啦，一隻「㪐毛㪐毛」个筆，寫毋著其中百股一股啦，毋過，寫！煞猛寫就著了！

現職：臺北市立教育大學人文藝術學院中國語文學系博士生

　　1999年921大地動，這空前个災難，在短短幾十秒个時間內，收走一條一條砸磳个生命，搖轉一個一個圓滿个家竇，係傷疾，毋過，傷疾个背後係溫情，親戚朋友个心手相連，時時付出關懷个社會人士……，這兜做下係在生人个生存動力。

　　十外年个時間，細樹使得成林，細人使得變大人，人个微細斯像地泥項个一沙一石共樣，少撇你，四季共樣運轉，霞痕無減佢半屑光彩，還係靚都分人毋記得敨氣，在生人，傷疾過後還係愛生活。記憶个拖箱肚，愛張思念，當然該淰都會浡出來个感恩，更加愛時時拿出來溫習，行出傷疾，人生還有真多精采个片段，等待這兜去開啟。

現職：退休教師

　　自細在客家莊過日仔，到今腦屎肚還添放毋忒个東西，用客話同佢寫出來，日仔，無論頭擺也係眼時就有吔蹤影。

　　得獎係鼓勵、係滋養，承蒙評審先生个牽成，恁仔細。

現職：客家電視臺語言管理師

　　「山精大戇」，係一篇獨白个散文，無用力去鋪排主題，就寫人同人之間溫溫仔个人情、感情定定。

　　「〡、〢、〣、〤、〥、〦、〧、〨、〩、〡〇」係異早漢人記數用个數字，二十世紀後期就全全歇在博物館了，毋過𠊎還係用佢兜來記數到今，因為該係大正１５（１９２６）年出世个阿爸，盡早教𠊎寫个漢字。

　　識字、讀書、出外、老來，行過大都市、食過大公司个頭路，𠊎還係一個山園出空來个山精，一個毋精同人計較、毋盼得豁忒一息人情个大戇胚，因為該兜係早早在山園就訓練了出來个，行去哪國乜係恁樣。

現職：客語教師