寫盡多年个文章，長透想用客家語寫出好聽个故事。這個故事一片寫，要一片問屋肚長者，請教仰般用漢字來寫客語？𠊎發現這實在有兜難，寫忒這篇，𠊎自家个客語，也有盡多个進步。

　　𠊎寫个係小朋友个故事，毋係盡傳統客家味个內容，故事發生个地點係高山頂，有客家人、學老人、原住民、外省人共下生活个地方。這兜小朋友，不分族群，和和樂樂為著共同个目標打拚，𠊎想在故事裡背表達个就是恁樣善良、簡單个感動。

　　承蒙評審分這篇得獎，𠊎會還較用心个寫出還較好个作品。

現職：臺北市國語實驗國民小學教師

　　得獎！心肝肚像打紙炮共樣歡喜，學習用母語創作係近年來對自家个期許，能得獎係盡大个鼓勵，𠊎心中滿係感恩！

　　俚身邊有當多故事有人性、有生命，無論係生趣个、也係絕對想毋到个；係感動人心、也係聽來分人齧牙皺目个故事，都有佢个意義。𠊎試著用母語描寫一條街路項人生百態，用最親切个語言書寫生命故事，感覺係當有意義个事。

　　𠊎從國中畢業離開家鄉開始，就盡少有機會講客話，對母語文學个喜好，係我尋轉原來个自家尋到生命源頭最好个方式。若係有寫出較像樣兜个作品就係盡歡喜个時節，乜會當奢鼻分人知𠊎係客家妹，以做一個客家人為榮。感謝有當多前輩行在頭前分𠊎兜學習，希望自家還愛煞猛學習，做得寫出感動人心个作品。

現職：臺東縣馬蘭國小教師兼任客家語輔導員、本土語指導員

　　非常感謝教育部舉辦用母語寫个文學獎，分客家語言个文章做得流傳，也愛感謝一路里來最支持𠊎个老公，還有臺中市教育局本土語言輔導團个總召、副召校長，分𠊎當多指點摎建議，正有這篇小說个產生。

　　〈該年避暑〉這篇小說个真實精神係寫阿姐對老弟个感情，也希望客家人細漢時節好搞个故事做得摎大家分享。

現職：臺中市馬鳴國小教務主任

　　無想著會得獎，就像99年底第一擺參加全國客家語字音字形比賽打頭名个心情共樣：得獎係盡好个鼓勵，係繼續向前行个力量！

　　這係一篇真人真事改編个故事，主要係想勉勵大家。盡感謝教育部舉辦客語方面个比賽，乜感謝客委會舉辦客語能力認證，分人有目標好打拚，就像文章肚講个，達成目標个學習過程，比麼个都還較重要，係無該兜比賽同認證，單淨講客語傳承，怕盡難激發興趣，乜異少人會堅持下去。係無該兜比賽同認證，𠊎三子哀毋會進步恁遽，𠊎乜無機會出門去教客語、做客語講師，無機會去培養客語人才，就單淨在屋下同妹仔講客家話定定。

　　另外，感覺著可惜个係，因為做毋得兼職，往後無機會直接去學校教學了，連「客語薪傳師」這個榮耀，跈等乜會分客委會削忒去了。到底仰般形正係「薪傳」？無做支援教師、無開薪傳班、無參加客委會辦理个研習，就無資格做薪傳師？寫客語文章、擔任縣政府也係民間團體辦理个客語方面課程个講師，就毋係薪傳正得？

　　雖然毋係為著「客語薪傳師」證書，正愛傳承客語，毋過，薄薄个一張紙，係一種鼓勵、一種身分、加一隻責任。加五年去，該張紙就會變廢紙，變到毋係客委會認為个「客語薪傳師」了！一想著無該資格後，企到講臺項，跈等乜會分人懷疑，該還傳承麼个？

　　客語薪傳這條路實在無恁該行！

現職：亞太創意技術學院聯合大學客傳所研究生

寫小說這條路係孤恓个，得著這个獎，蓋歡喜。

𠊎愛感謝阿婆、爺哀，教𠊎恁優美个客話來寫詩文小說。

～～～寫作个路，𠊎會繼續行下去个～～～

現職：國立新竹教育大學臺灣語言研究與教學研究所博班生

感謝主辦單位分𠊎有這个機會參加比賽，也打幫評審先生分𠊎个肯定，這係分𠊎盡大个鼓勵！歸篇仔个文章愛用客家話來寫，有成時有音無字，就愛尋教育部推薦个用字／客家字典／辭典／客家諺語／師傅話等等，盡量摎華語語詞轉到客家話來寫，平常多看客家个文章，分自家多練習，就會進步！客家諺語講：「敢去就一擔柴，毋敢去就屋下愁。」客家諺語又講：「有心黃金土，無心荒草埔！」故所，分自家機會，人生就有當多个機會！大家共下煞猛个來傳承客家文化哦！無定著下二擺得獎个就係您！承蒙大家！恁仔細！

現職：國立中央大學客家語文暨社會科學學系客家研究所

　　逐擺，轉到莊下个老屋，摎叔公阿伯也係叔婆伯姆講話該時，免不了愛用客話正有辦法摎佢這兜溝通，最輒常談論个話題係年冬收成个情形，有成時乜會談論到哪家鄰舍發生个事情，不管摎佢這兜講麼个事情，聽著鄉音鄉語就當有味緒同親切个感覺。

　　用客語來寫客家莊个故事係近年來个興趣，因為每一張淳厚个面容背項都有佢自家動人个故事，可能係風神个事跡，也有可能係委屈个秘密……文中阿發嫂个秘密，因為細心臼仔跈人走个事件，又將厥个痊癒个傷口再過扯開，佢臨尾用寬容个態度來化解，其實乜係對自家拋夫棄子个救贖。下筆固然艱辛，修改更係費神，每每有「恨鐵不成鋼」个感覺。獲知幸運得獎，久久毋敢相信，確實係繼續寫下去最大个鼓勵。感謝教育部舉辦閩客語文學獎个活動，感謝評審个肯定。

現職：無

「徙屋」係𠊎爺哀真實个故事，佢體現吾姆刻苦耐勞、勤儉操持个客家婦女「四頭四尾」个精神，以及三從四德个美德。感謝評判先生對「徙屋」个肯定，這个獎項愛獻分既經在天頂相會个爺哀，𠊎愛用這篇作品表達𠊎對爺哀最深最深个懷念……

現職：高雄市六龜區荖濃國民小學校長

客家文化有山歌，老人唱來笑呵呵，仰會後生毋好唱，問題在哪你知無？

敢係歌詞無安名，也係曲調聽到懶，無成節奏忒死板，可能銅鑼磬鏘聲。

山歌文化客家心，改編山歌曲調新，節奏輕快多變化，後生唱出山歌情。

現職：桃園縣華勛國小教師兼教務主任　退休