行入心靈，行向世界

邱一帆

　　2011年教育部委託國立成功大學，辦理臺灣本土語言文學獎，既經順利完成，算起來這係教育部第三擺來做恁樣有意義个事情。無論係企在傳承臺灣多元族群語言个立場；抑係面向創新臺灣族群文學个角度；還係為著豐富臺灣多元主體个文學，仰般講政府來推廣這活動，就係當有搭碓，當好恁好个「頭路」，這毋單只增加臺灣母語文學創作者發表个園地，也提昇了臺灣母語个文學地位，同時也係政府向世界展現，臺灣有多元主體个語言文學，盡重要恁重要个象徵！故所，所有參與承辦、評審工作个人員，當一致認為教育部有必要、也有義務逐年來舉辦臺灣本土語言（原住民族語、客語、臺語）个文學獎，來延續、創新臺灣本土多元語言个文學同價值，分大家來認同、共下來欣賞。

　　這擺，有評審比較客語文學各類參賽作品个件數，現代詩比散文較多，散文又比小說較多，客語小說學生組甚至無作品來比賽，參賽作品總下个件數，比較上擺又有較少兜仔！探討其原因大概有：公佈比賽个時間有較匆忙、宣傳毋罅、還過，各類作品个完成，本成就其無共樣个難度！當然，客語文學創作个人口，無論數量、無論比例就有較少，自然參賽作品就會較少，比較華語文學、臺語文學，客語文學還在學行路个階段。

　　面對恁樣个情況，政府單位還較有必要來挰持、來扶持像客語文學恁弱底个性體，分佢有自主行自家个路个條件，當然，另外一方面，客籍作家自家也愛有認知、有覺醒，用客家話來創作客語文學作品，最做得精確、生動來表現客家人个行為、感情、思維同價值觀念，體現客家人同別個族群無共樣个語言文化！進一步影響還較多个客家人來從事客語文學个創作，建立自家語言所創作出來个文學品牌，從根柢重建自家族群文化个認同摎自信，這條語言文學之路，當愛有人共下來行，這種語言文學運動，值得大家共下來打拚！

　　政府單位係講做得逐年開幾下百萬、幾下千萬甚至幾下億銀个錢，來辦理臺灣原住民族群、學老族群、客家族群个語言文學創作獎，成為每一年就會舉辦个、有重要意義、有代表性个文學盛事，總比政府逐年就開一條又闊又長，花幾下十億、幾下百億个馬路，還較有意義、還較有價值！因為，語言，正係族群个命脈；文學，正係通向族群、定疊心靈盡永恆个道路，只有各個族群行轉自家个語言、文學之路，臺灣正有法度真正反映語言、文學主體多元个面目，也正有可能自信行向社會、行向世界！毋知大家仰般認為？