會當著獎實在足好運，我知影「人外有人」，受著肯定嘛特別感謝。回想學台語的路途確實充滿鹹酸苦澀。上困擾的是用字無仝的問題，親像「腳」，台語寫做「跤」，毋過地名一般攏是寫「腳」，親像「大腳腿」、「苦苓腳」、「茄苳腳」、「樹仔腳」，攏是「腳」……所以我咧戇想：有一工若會當用社會常用字來寫作，無論是寫抑是讀的人攏會較方便。行入先輩行過「彼兩條長長的牛車路」，我知影這毋但是好運嘛是責任。我提醒家己愛koh較拍拚咧。

現職： 臺南市立大灣高中 高中部國文科 專任教師兼導師

　　年歲來到這个坎站，人生應該是無啥物變化。

　　文學的性命，猶有無限的可能。

現職： 國立臺南第一高級中學 社會科教師

　　「啥？騎鐵馬去武嶺𨑨迌的文章嘛會當著本土文學獎！敢有影？」敲電話共阮牽手報這个好消息的時陣，伊一直毋相信。

　　2冬前，「臭豆腐的滋味」頭一擺著獎的時，有朋友問我：「恁寫閩南語散文的人，敢若攏寫一寡古早的代誌、無就是囡仔時的記持，敢無法度較接近現此時的生活？」

　　這篇「佇海拔3275公尺頂懸喘氣」，是我對伊的回應，無蓋成功，毋過會使試看覓！

現職： 臺中市西屯區何厝國民小學 教師兼主任

現職：國立臺灣師範大學 臺灣文化及語言文學研究所 博士班

　　教育部2008年開始舉辦台灣母語文學獎，台語文界攏萬分歡迎。

　　第1屆我的台語小說處女作〈甘願做牛〉得著第3名，歡喜kah親像小學生頭1擺領獎品。

　　第2年我改寫台語散文〈愛河童誌〉投稿，得著第1名；這擺除了歡喜，同時嘛開始感受著壓力。

　　第3年竟然停辦？台語文界攏足失望兼怨嘆，當然嘛有真濟人姦撟（kàn-kiāu）。

　　真歡喜2011年koh恢復舉行，這屆我的〈縛阿爸ê手〉得著台語散文第2名，感謝評審團繼續鼓勵。

　　佇tsia欲koh大聲呼籲，這个文學獎值得擴大辦理，請教育部無論如何，毋通koh停辦--ah，感恩！

現職： 國立臺灣師範大學 臺灣語文學系 碩士在職專班

　 　閃爍ê星光是對一萬光年進前所傳來ê，經過無窮無盡ê風雨粒積kap歷史再評價ê痕liah，tsiah咧阮面前光彩展示，pò-tiānn阮今生所堅 持ê寫作理想，是無法度hőng理解ê，但是經過百年了後，伊可能會佇某一ê所在，展出伊ê光芒、伊ê價值，前輩ê堅持，阮後輩ê接續，袂斷，但是無搭 著主流大眾ê火車母，也代表這條路孤單、歹行，用骨頭重疊起來ê真理，代價真大，無理解ê人真濟，會覺悟ê人真少，滿腹ê道理，也是kauh佇火車母下跤 ê鐵枝路，誰人會了解伊ê責任？

現職： 國立成功大學 臺灣文學系 博士班

　　接著主辦單位通知講我的這篇作品得獎，心內真歡喜，非常感謝評審委員的肯定！

　　這个獎，我愛送予我彼个已經去做仙、四界雲遊的阿爸，相信伊仝款會去共逐家展──展伊的查某囝有偌𠢕……。

　　用爸母講話的氣口，用咱在地的聲嗽──寫故鄉人、記故鄉事、講故鄉的沓沓滴滴，是我對「母語創作」的堅持。

　　「母語文學」佇台灣，已經對石縫裡探頭出來矣！已經開始生湠矣！已經開出一蕊一蕊的花蕊矣！已經予咱鼻著迷人的芳味矣！

現職： 臺南市南區新興國民小學本土語言支援教師、臺南市古都電台台語老師兼特約主持人

　　寫這篇〈批〉是欲紀念我的好朋友素枝，為阮的朋友緣留落紀錄。毋過因為心疼，所以情思雖澎湃，卻久久難以下筆。見擺寫無幾字，就目屎流、目屎滴。目屎那流那拍字，歸尾是目屎四淋垂，難以繼續。就按呢寫咧、停咧，延到截稿日姑不而將凊彩完稿。

　　歡喜這篇〈批〉榮幸得著文學獎，祝願共這个光彩佮佇天頂的素枝分享。

現職： 退休教師

　　「紅色kuân-ta̍h鞋」這个議題自電視劇「khiàng跤婦人人」（「犀利人妻」）開始播出tō佇腦海中醞釀，有一日若是男性穿紅鞋，除了Michael Jordan的紅鞋，閣會按怎予人解讀咧？Kám會像女性有tsiah濟解釋？

　　這擺得獎實在真意外，頭擺創作散文tō受到評審老師的肯定，予我有信心繼續從事文字工作佮寫作，多謝評審老師。

現職： 行政院文化建設委員會 專案助理