成長、生湠ê台語文學

何信翰

　　經過30冬左右ê時間，台語文學ùi原本只有個位數ê創作者、無juā濟讀者，漸漸得tio̍h社會大眾ê認同kap參與。有台語文學在內ê文學獎mā jú來jú濟──tse其中包括各縣市舉辦ê文學獎kap濟濟民間團體ê台語詩／小說創作獎。佇tsia ê有台語文學ê文學獎內底，教育部已經進入第3屆ê tsit ê本土語言文學獎（今年號叫“閩客語文學獎”）無疑是其中規模siōng大ê幾ê之一。

　　Tsit遍ê文學獎維持往例，分作現代詩、散文、小說劇本三大組，逐大組koh分作社會、教師、學生三小組。逐組先經過評審ê初選，選出入圍ê作品， tsiah koh經過複審會議，ùi入圍ê作品內底選出各組前三名。

　　有一ê值得歡喜ê現象，是今年投稿ê作品平均水準tsin懸，kap往年比起來有khah進步。Tsit點會當ùi各組評審ê感言看出：無論是詩ā-sī 小說ê評審，攏講tio̍h入圍ê作品水準tsin齊mā tsin袂bái，所以佇選擇前3名ê時有tú tio̍h淡薄仔困難。可惜今年因為預算ê限制，教育部ka-nā編前3名ê獎項，無親像以往ê第1屆，有佳作ê名額。致使有寡仝款有相當水準ê作品 suah無法度得tio̍h獎勵。

　　另外一ê會當佇tsit擺比賽看會出來ê，是佇台語文學內底，詩ê創作者ā-sī tùi詩ê創作有興趣ê人比散文、小說創作者ke tsin濟。Tsit遍投稿ê作品內底，詩ê作品占6成外，散文kap小說劇本2組ê投稿作品加起來khah無4成。Tsit ê比例符合台語文學ê現狀──畢竟戰後kàu taⁿ所有公開發表 ê台語小說khah無500篇，毋過ka-nā佇2000-2010年tsit 11年中間，tio̍h有將近7000首台語詩公開發表。小說ê創作相對詩來講，需要koh khah長ê時間，毋過tse mā是相當重要、有影響力ê文體。有志ê台語文創作者應該khah tsia̍p嘗試小說、散文ê書寫。

　　Tsit遍各組選出來ê前3名，攏有佇題材方面tsin創新、tsin有時代性ê作品。Tse一方面證明台語文學毋是ka-nā會當寫傳統、古早ê物件， koh會當寫環保、寫科技、寫跨國公司ê剝削、寫異色……等等；另外一方面mā會當說明當代ê本土語言創作者ê背景、教育、身分攏已經kap華語文學無啥 物無仝。Tse是tsin值得歡喜ê現象。

　　Ǹg望經過tsit遍ê比賽，會當hōo一寡優秀ê台語文創作者得tio̍h鼓勵，mā會當激發koh khah濟人投入台語文學ê創作，hōo台語文學koh再行向另外一 ê高峰。