第一名　蔡秀英《 擉算 》

創作ê路毋敢歇睏

   

　　 賀喜ê電話相連紲

　　 現此時記持ê倉庫雄雄拍開

　　 恬靜nǹg出來ê半暝

　　 關20偌冬ê堅持

　　 傱出來耳空邊喝咻

　　 文學ê跤步「毋敢停」

　　

　　 若想起學習ê路

　　 心肝頭一陣一陣燒烙

　　 感恩ê心傱懸躘低

　　 像海湧踮心肝窟滾絞

　　 進前剝袂lut-thī ê夢

　　 沓沓仔發酵

　　 激出一甕芳醇ê

　　 文章

　　

　　 記持內偷藏

　　 一个一个戇想ê夢

　　 雄雄好夢相隨

　　 注定閣是一个

　　 失眠ê暗暝

　　

　　 20偌冬向望

　　 一步一跤跡行來

　　 一點一滴紀錄

　　 創作學習ê路草

　　

　　 攏有恩師牽教ê跤跡

　　 伊用袂少ê精神

　　 一字、一字教我創作

　　 教我用文字表達想法

　　 用文字落實感情

　　 攏會使做夢

　　 嘛會成真

– – – – – – – – – – – – – – – – – – – – – – – – – – -《閱讀作品》