第一名　林芝吟《 佮海約會 》

用我的母語我的手，寫我的話我的心情

　　會當用台文來書寫，紀錄每一个時陣的思想佮感動，毋但是挑戰嘛是我誠久以來的願望。細漢的時，上愛佇樹仔跤聽大人咧講故事答喙鼓，彼个時陣會曉聽、會曉講、煞袂曉寫。落尾來彰化師範大學臺灣文學研究所讀冊，佇咧臺文所老師的牽教佮指導，我才開始用家己的母語文字寫詩寫文章。
　　頭一擺參加文學獎，會當著獎誠歡喜誠幸運嘛實在是不敢當，毋過我真感激評審老師予我這个肯定佮鼓勵，我會閣較拍拚，嘛會當做是我繼續共母語文字傳承落去的動力，因為語言是文化的底蒂，每个人的母語攏是上媠上珍貴的禮物，咱若會使保存家己的語言，就若親像開一扇窗仔門，看著另外一个世界，佇這塊土地逐家互相尊重，予咱的母語文化代代相傳落去。
　　多謝教育部予我這个機會，多謝評審老師，猶有阮彰師大臺文所老師的鼓勵，予我認捌文字的媠氣、詩的世界，所有捌拄著的風霜佮考驗，攏是予我的文字沓沓仔發穎的養份，我會繼續堅持認真學習。
　　只要有心想欲替這个社會出一寡力，毋管創啥物攏好，總是有咱做會到的代誌。人生的路行到這个坎站，猶有法度樂暢做家己想欲做閣有意義的工課，這毋但是我一直咧追求的目標，嘛是一層幸福的代誌。

– – – – – – – – – – – – – – – – – – – – – – – – – – -《閱讀作品》