第一名 蔡秀英 《紅跤蹄的故鄉》

感恩ê心

　　下班ê彼時，點開手機，看著濟濟好朋友，傳來賀喜ê句讀。

　　詳細看，歡喜、驚疑對半分！

　　歡喜ê是這改投稿，閩客語文學獎ê詩類，著頭名，驚疑ê是，敢是咧做眠夢？

　　按2000年踏入社區公民大學，綴詩人路寒袖恩師學習文學創作kàu-tann嘛有24冬……

　　騎機車欲轉厝，沿路想欲大聲háu，這世人下上大願，就是欲mooh文學獎報答恩師濟年來ê牽教無白費心晟，這馬做到，煞一直想欲大聲háu

　　踏入文學創作這條路，我行甲無啥平坦，予無寫作ê天份限制，成果有限。毋過，堅持寫咧、寫咧、20外冬就按呢掀過篇。

　　感恩，見擺想欲放棄寫作ê時，就有寡朋友鼓舞我一定愛堅持落去。

　　嘛著愛感恩柯柏榮詩人，教我臺語字正確用字。

　　感恩游鍫良詩人，抾我這个頇顢師仔去牽教，按寫詩創作著愛用生份語言教起，嘛是有伊長久以來，一直鼓舞，叫我著愛一直寫，就會進步。

　　感謝主辦單位予我有機會參與這改文學獎比賽，才有機會提著獎。 欲感恩ê人誠濟，有機會才登門一一感謝。

– – – – – – – – – – – – – – – – – – – – – – – – – – -《閱讀作品》