第九屆教育部閩客語文學獎閩南語散文類教師組 評審感言

  撰稿:何信翰

– – – – – – – – – – – – – – – – – – – – – – – – – – -《閱讀全文》

  第二名　呂寶欽《 煡粿 》

　　自早就足想欲共阿母煡粿的工夫用文字記錄落來，毋過進前所學的是華語教育，若是用華語來寫這篇文章，我定著會捎無摠，會感覺keh-kuāinn keh-kuāinn，足濟所在閣按怎講也無法度親像用母語寫的遐tuann-tiah，遐媠氣，譬喻講「甜粿」華語講「年糕」，毋過論真講，若較幼路的區別，閩南語的「粿」和「糕（仔）」是無仝的兩種物件，閣再講「煡粿」這个真母語氣的詞彙，無定是我較頇顢，我猶無才調對華語內底揣著一个詞來對應；閣舉一个例，「撋粞」嘛是仝款的理路，這就是「文化差異」的所在，佇咧寫這篇散文的時陣，我深刻體會著母語是咱臺灣成做「多元文化」國家的肥底。

　　人生足濟代誌予人料想袂到，想起來嘛誠見笑，講幾若十冬的母語，煞毋知影母語嘛會當用文字共寫出來，好佳哉，有一个機會佇111年11月底，參加高雄市教育局辦的輔導本土語認證測驗的講習活動，毋但予我大開眼界，閣拍通我的「任督二脈」，現此時規心栽落去學習本土語文，寢頭感覺不止仔僫學，這馬愈學愈心適。

　　感謝評審老師無棄嫌我的作品，閣予我提著大獎，對我這个菜鳥仔來講是真大的鼓勵，榮耀歸予我敬疼的上帝，願上帝賜我智慧佮氣力，會當和諸位有志相佮拍拚，共本土語文教育生湠落去。

– – – – – – – – – – – – – – – – – – – – – – – – – – -《閱讀作品》

  第三名　林芳汝《 藍色紅頭嶼 》

　　好佳哉毋是眠夢，多謝評審的肯定。這是我第三擺參加文學獎，嘛是頭一擺著名，有影蓋歡喜。

　　我佮意四界𨑨迌，這篇文章就是我去紅頭嶼轉來所寫的。除了欣賞風景以外，向望逐家會當透過旅行了解在地的文化，順紲整理家己的情緒。

　　希望這篇散文會使予閣較濟人知影臺灣無仝所在的文化佮美麗，用心去感受這片土地的媠。

– – – – – – – – – – – – – – – – – – – – – – – – – – -《閱讀作品》