第一名　張青松《 雙港記 》

　　Одеса，烏克蘭語的敖得薩，英語號做：Odesa，佇烏克蘭西南爿的第一大港，第三大的都市，是溫暖閣迷人的港都，予人號做「烏海真珠」（Pearl of the Black Sea），真拄好打狗嘛是臺灣西南爿第一大港佮第三大都市。。
　　露西亞攻擊敖得薩了後，人民無愛講露西亞話，攏特別講𪜶的母語烏克蘭話，所以這首母語詩內底的敖得薩特別用烏克蘭母語Одеса，是為著表達對烏克蘭人的尊敬。。
　　日頭花佮斑芝樹攏是烏色的種子，斑芝花是打狗市花，懸度時常超過五層樓，嘛予人號做「英雄樹」，火紅的大蕊花規蕊落落塗，親像高雄人勇敢熱情的個性，親像敖德薩人拚死抵抗的精神。
　　烏克蘭佮露西亞的國花，攏是日頭花。真濟臺灣人民嘛捌手攑日頭花，發起的公民運動，造成了後執政黨無愛聽人民聲音的政權下台。。
　　臺灣志願兵撒奇萊雅族的曾聖光，不幸佇烏克蘭東爿戰死，烏克蘭軍方佇利維夫的教堂舉行告別式，曾聖光的母親、阿姊佮牽手攏有去送伊。伊在生捌講，若無去參加保護自由的戰爭，阻擋橫霸的政權，閣來戰爭就會發在佇自己的故鄉，所以保護烏克蘭就是保護臺灣。
　　美麗的地球無畫界線，並無啥人是啥人一部份；咱的祖先是兄弟姐妹，咱攏愛光明熱情的日頭花，手牽手，心連心，共同守護所有民主自由的國家！

– – – – – – – – – – – – – – – – – – – – – – – – – – -《閱讀作品》