台灣客語文學獎个意義

范文芳

臺灣个中央政府教育部，主辦臺灣閩客語文學獎，各組得獎者已經出爐，𠊎有幾句話，想愛借這個機會，同所有關心臺灣文學个朋友報告。

首先，𠊎個人認為，教育部主辦這項活動，實質个意義，係鼓勵用臺灣語言創作臺灣文學。其象徵意義，有兩項，一者係表示臺灣應該創作自家个文學；二者係愛用臺灣語言正有可能寫出好个文學。

下背，𠊎有幾點說明；
一、語言文字係文學个書寫符號，語文毋單止係工具，同時也係文學藝術个主要元素，唯有作家自家最親切个母語，正有可能用來表達佢所關心个人生、社會、時局、感情。

二、回頭來看義大利个文學史，但丁捨棄典雅个拉丁文，採用義大利語來寫詩，方才奠定了義大利文學个價值同地位；近代史上个美國，詩篇同小說个創作，不只主題題材，就使用个語文來講，也係有別於標準个英語，故所，兜愛寫出好个臺灣文學，定著愛用臺灣个語文，毋使迷信標準北京話或者典雅个中國古文。

三、經由教育部來主辦臺語文學獎，同近年來各縣市所辦个文學獎係無共樣个意義，根據𠊎个了解，絕大部份个文學獎都無強調必須使用臺語，臺灣文學同臺語文學在語意內涵上還係有息把仔差別。

四、任何族群國家个文化，必須愛有文學藝術來提升厥品質，同時文學也係提升語言个最有力个方式，𠊎認為愛提升他人對臺灣語言个刻板印象，用臺語寫出好个文學，係最有效个手段。

五、從語言个發展歷史來看，一種語言採用哪種文字來書寫，本來就係佢自家个選擇，目前臺語个書寫，借漢字來書寫，係一種方便法門，並非唯ㄧ標準。文學作家可以講係語言文字个發明家、藝術家。

六、臺語書寫牽涉著用字个技術問題，對於作家來講，並非當重要个課題。