第一名 蔡錦德 《夜婆車》

　　感謝教育部辦理文學獎，提升台語文的重要和價值；多謝評審委員對小文的顧愛佮評論，予我有閣較大學習參成長的機會。

　　寄望教育部逐冬攏會當舉辦文學獎，向望愈來愈濟人投入去寫作，參加這个有意義的活動。

第二名 陳龍廷 《疏開》

　　有看見臺灣，毋過敢有看見臺灣人？敢有聽見臺灣人的聲音？

　　我有熟似一寡金門的朋友，伊定定用非常古錐的金門話來佮阮交談，毋過有人反應講伊講的話聽無，伊辯解講：「阮講閩南語啊，恁講的是臺語啊！」按呢講，嘛是無毋著！

　　「疏開」是日文漢字，嘛是臺灣人直接用臺語發音的臺灣話。這个詞彙雖然字典無收，歷史教科書毋捌教，毋過卻是濟濟的臺灣人用怹的血汗、用怹的目屎、用怹的性命做伙度過的共同經驗。怹毋是干焦查埔--的、查某--的，嘛毋是干焦老歲仔，抑是囡仔，遮的臺灣人敢攏無家己個人的故事？我只是想欲共怹的性命經驗，用怹生活的話共寫落來。

　　以前戒嚴時代，阮佇學校所讀的教科書完全脫離現實，地理課本予人消遣是「歷史」；歷史課本予人供體講是「小說」。現在我共臺灣人伊家己的故事寫落來，借用一个英文的詞彙來說明，history（歷史），嘛只不過是伊的（his）佮故事（story）兩个字根連做伙而已。

　　若按呢，我敢毋是用小說咧寫「歷史」？

第三名 鄭昱蘋《福州囡仔》

　　首先，非常感謝評審老師對這篇作品的肯定。

        鄭汀官是我的親阿伯，伊人漢草好、冊會讀、字寫了媠、閣𠢕煮食。我的博士論文是研究日本時代公學校國語課本的教材，因為伊讀過日本冊，所以就拜託伊共我鬥翻課文的意思。就是佇咧彼个時陣，我好玄問起阿公和細漢的代誌，阿伯伊那講我那記，才有這篇小說的故事啦。    

        阿伯尾仔佇王梨會社做工課，嘛娶某生囝。誰知後來伊煞出去做兄弟。民國五、六十年的時，伊是縱貫路有名的大鱸鰻。雖然伊蓋出名但毋是角頭的大的，等到伊老矣，南投一寡在地的少年𨑨迌囡仔，面頭前喊伊「大的」，背後攏訕削伊叫「盡磅的」。

        會記得一擺總統選舉的時，伊笑講有一位外省仔去予一陣少年仔搧喙䫌。我雄雄問伊：「阿伯，你對福州來的，你嘛是外省仔啊？」伊一時恬靜無講話。

        佇咧寫作的過程中我才漸漸理解，是按怎阿伯會去做鱸鰻。原來身份的認同，一直是伊做一位福州人咧走揣的歸屬。尾仔伊有轉去福州，只是毋知影伊佇故鄉遐有揣著伊欲愛的歸屬無？

        一金師早就做仙矣，阿伯、阿爸嘛過身矣，阮頂兩代的福州人攏落葬佇遮。感謝有的拍拚，才有阮代代生湠佇這片美麗的土地。

        其實，毋管咱對佗位來的，只要肯認真、認同這个所在，這塊土地攏會用愛共咱攬牢牢！