第一名 陳美蓉《學「老」》

　　講客，係天生自然个。用客話寫文章，係學等同心肝頭項个話語整理好勢，同佢寫出來。

　　承蒙感謝恁多評審先生，恁相惜，對𠊎寫个文章打恁好个成績。毋過，𠊎想𠊎還有當多愛學个所在。有好學，當好、當暢。寫一篇客話文章，係一轉拈轉客話个旅程。係一轉歡喜暢樂个旅程。

第二名 張馨如《運命交叉點》

　　這係第二擺參加教育部舉辦个閩客文學徵文乜係第二擺得獎，實在當歡喜。再度得獎係當大个肯定，最歡喜个人做得講就係吾爺哀；自𠊎退休後，逐日摎佢兜做伴，為著鼓勵老人家愛輒輒講話就纏等佢兜講古分𠊎聽，聽著个故事全變做𠊎寫文章个材料，這擺得獎毋單淨鼓勵𠊎乜鼓勵著吾爺哀，這係歸屋下人个歡喜。

　〈運命交叉點〉係人生故事个反省，分人知得世界上無永久个成功乜無永久个失敗，雖然愛有該命乜愛有該運，毋過，除忒命摎運之外，還係愛自家肯打拚，人生正會有轉變个機會，摎大自家共同勉勵。

第三名 曾秋梅《茶芯祖孫情》

　　首先愛感謝閩語林美麗先生个鼓勵，有勇氣投稿參加比賽。逐擺看佢參加閩語組个小說比賽，都打頭名，用欣羨个心聽佢寫稿个心得。

　　在文學營研習時，主辦單位都會要求參與研習个學員，研習後必定愛投稿分主辦單位。客語先生過無勇氣投稿，驚客語先生分主辦單位講話，高不將自家鼓起勇氣練習寫文章。先對簡短个詩寫起，一直到寫散文。知自家个能力到哪，自認為內容毋係盡豐富，乏善可陳。林美麗先生看著在文學營投个稿，就鼓勵定著愛扭等機會去投稿。前年仔客家筆會有辦文學徵稿比賽，就鼓起勇氣投稿，篇名《轉黃个舊相片》，結果得著散文組第二名。

　　經過一擺兩擺个投搞經驗，美麗先生又在後背緊𢱤，就恁仔參與這擺106教育部閩客語文學个比賽。得著第三名，這係人生中最榮幸个一件事，未來會繼續寫作，留下自家精彩又趣妙个人生腳跡。