第一名 吳餘鎬《掌鵝仔》

　　得正走分鵝公逐到無空好囥，一下仔自家又係一隻白頭公仔囉。想起頭擺經過个艱辛，這下全係淰淰个甜蜜。承蒙評審相惜，分𠊎恁大个鼓勵──俚客人，用客話，寫客家个事物，表達客人个感情、文化……一滴都毋會見笑。

第二名 張瑞玲《䀯老鼠》

　　首先，愛勞瀝評審先生个牽成同鼓勵，分𠊎有機會用自家个語言寫自家生活裡肚个事情。

　　因為本身毌係真浪漫个個性，寫毌出心肝肚對人、對事个深深情感，恁堵好一隻遊遊野野个老鼠，好恬恬撞入吾个生活裡肚，提供𠊎一個真好个寫作題材。當初時，也不管會得獎無，𠊎用輕鬆、心色个態度來記錄䀯老鼠个過程，無胚想，嗄正經得獎咧！實在有罅歡喜！

第三名 黃士蔚《客家姊妹》

　　100年第一擺參加，現代詩得教師組第二名，102年寫散文同現代詩，用讀臺灣語言研究所學生个身分參加，得著散文類第一名，104年改轉教師身分，參加小說同現代詩兩樣比賽，小說無得獎，現代詩退步到第三名。106年本來愛寫小說，試試自家个能力，結果無閒直掣，還係寫轉散文，將姊妹伴个故事寫出來，得著第三名，雖然也異暢，毋過試著還愛較煞猛正做得。 　　

　　得恁多擺獎，肩頭像㧡越重个擔頭，毋係為自家寫，係為千千萬萬个客家人寫，會講毋會寫个人盡多，毋會講个人還較多，毋遽遽寫下來，有味有緒个客家文化就會漸漸仔消亡了。