閩南語短篇小說類學生組評審ē話 / 宋澤萊

這擺（104年）ê小說徵文比賽，有兩个特點：

　　一个特點是稿件增加。這个特點表示寫臺語小說ê人愈來愈濟，臺語寫作ê人有愈來愈普遍ê現象。也ē-sái講，教育部ê徵文比賽愈來愈[予人]看重，逐家願意共稿件投來tsia ê一个結果。

　　另一个特點是教師組hâm學生組ê水準比社會組有較懸。往年，社會組ê水準總是比老師組hâm學生組懸；現此時情形已經改變，社會組水準顛倒較 kē。這个特點表示，臺語小說ê寫作訓練愈來愈重要。因為社會組ê作者真濟人無經過學院ê訓練，較欠缺羅馬字kap臺灣話ê基礎，致使in寫ê小說內底亂用文字，口語粗俗，水準tō降 kē。可見，現此時想beh創作臺語小說ê人，一定要自求進步，認真學習，千萬毋通認為家己是臺灣人，tō一定ē-tàng寫出好臺文。

　　下面，評審beh對每一篇得獎ê作品做評論。

學生組：

　　第一名是〈辜負〉。這是一篇假設小說。講立法院正在立一个「替死法案」，也就是講無想beh活ê人會當替死刑犯去死ê法案。由一个委員會投票來決定法案是毋是通過。這个委員會分做兩爿，贊成ê人hâm反對ê人數差不多平濟。小說真長，內底牽涉tio̍h無基督信仰ê人大部分認為無想beh活ê人當然會當替死刑犯受死，因為án-ni做，雙方攏袂食虧，想beh死ê人會當死，啊想beh活ê人會當活，各有所得。但是，有基督信仰ê人tō毋是án-ni想，in認為生命是神所賜，任何人攏無權利叫家己了斷家己ê性命，想自殺是毋著ê，因為辜負神ê恩賜。作者用這个假設來辯論目前上熱門ê「廢除死刑」hâm「贊成死刑」ê社會議題。

　　作者對羅馬字相當內行，語言扭掠有味。這是第一个特點。閣來，這是一篇辯論小說，雖然用小說來做嚴肅ê辯論，並毋是妥當ê做法，án-ni會予小說失去文藝性；不而過作者掌握現此時上熱門ê「贊成死刑」hâm「廢除死刑」ê議題，猶原予小說有閱讀性。這是第二个特點。佈局ê成功也是這篇小說ê特點，本來緊張ê表決，因為種種ê因素，到最後贊成hâm反對雙方無輸贏，猶是袂當決定是毋是通過，化解了所有ê緊張，這種結局予讀者感覺驚奇。這是第三个特點。總講，這篇小說ê優點真濟，伊得著第一名毋是無原因ê。

　　第二名是〈病〉。這是一篇社會諷刺小說，寫一个對美國轉來臺灣ê精神科醫生ê故事。原來這个醫生曾經是烏名單ê留學生，tī美國蹛30年。伊轉來臺灣了後，予政府聘請去擔任一間起造tī山頂ê神秘療養院ê院長，專門照顧一種特殊ê精神病患。這種患者，筋骨特別ngē-tsiānn，攑起的手放袂落來，喙裡時常大叫「當選」ê口號，起性地會拍人。只要競選季節到ê時，這種病患特別濟，致使療養院病人煞傷濟。原來tsia--ê人攏患著選舉病，而且有傳染ê危險性。後來，國防單位為tio̍h保守國家機密，煞將這个醫生hâm所有工作人員攏拘留tī療養院裡，毋准離開。這个醫生煞無法度轉去美國，無偌久，這間療養院發生大火，這位醫生hâm所有ê工作人員攏燒死tī大火裡。

　　作者ê臺文真好，運用羅馬字ê能力懸，這是上大ê優勢。可惜，作者欠缺佈局ê才調，傷過頭早講出這種病症，致使小說ê懷疑性煞失去，無法度吸引讀者。同時小說拖拖沙沙，到落尾予讀者感覺疲勞。不而過，作者正確寫出臺灣人沉迷tī選戰內面，社會實在患著嚴重ê選舉病，予咱會當做反省。所以，這篇小說得獎是合理的。

　　第三名是〈天欲光ê時〉。這篇小說寫一對散赤ê翁仔某ê生活實情，予人心酸。做某ê是年老慢慢失明ê人，青光眼ê症頭變嚴重，最後眼前ê物件看袂清楚，變做一層ê霧。較早，伊捌對家己ê命運憤怒過，不而過憤怒對實際無幫贊，久了後，伊只好接受命運ê安排。佳哉，伊猶會當用摸ê去大廳燒香，也會當煮飯、飼豬、種菜，日常生活猶無需要別人鬥跤手。做翁ê當然也是一个老人，伊較早tī一間食品工廠做工，捌做到領班，本來生活無問題，想袂到工場倒去了後，伊tō揣無工課。伊愛真困苦踏著一臺三輪車，去各地抾歹銅舊錫、簿仔紙，也愛揣時間到麵店仔做洗碗ê工作，才會當維持in翁仔某ê困苦生活。這對老翁仔某本成有一个查埔囝，老實乖巧，後來去臺北拍天下，嫖賭飲亂亂來，最後死去，這對翁仔某就án-ni過tio̍h一日閣一日無向望ê日子。

　　作者這篇小說ê內容其實非常普通，愛聽刺激故事ê讀者一定會感覺這篇小說真無聊。不而過，作者描寫故事場景ê才調真懸，庄跤所在ê風景寫kah真媠，實在了不起。同時，伊ê文筆有感情，對散赤人有同情。tsia--ê優點攏是伊得獎ê原因。