閩南語現代詩類教師組評審感言 / 方耀乾

　　104年臺語新詩類教師組總共有30篇參賽，比頂一屆較少9篇。由3位評審委員李勤岸、林淇瀁、方耀乾，佇2016年1月7日下晡，踮中央聯合辦公大樓18樓舉行決審會議，最後選出前 3名的作品：名次分別是第1名〈親像，一蕊火〉、第2名〈愛河〉、第3名〈苦旦─寫予廖瓊枝〉。

　　這屆的文學獎的評分標準的項目分別是: 一、母語使用能力，佔40%；二、結構佮修辭，佔15%；三、內容豐富性，佔15%；四、內容流暢度，佔15%；五、內容創意性，佔15%。會設定頂面的評分結構，這是會當理解。這个文學獎對母語使用能力的要求佔上懸，原因是長期以來臺灣的教育體系裡臺灣母語並毋是主要的教育語言，大多數人的母語書寫能力無好，所以要求這種上基本能力是必要的。好佳哉，這屆教師組參賽的詩作普遍來講，臺語的語法佮語詞有比以早較端的，這表示母語的推動佮教育對語文的書寫有一定的正面影響。

　　佮頂一屆的情形仝款。雖罔語法佮語詞的運用有比以早較端的，不而過，咱發現詩的質素並無大大提升，這也表示咱的文學教育猶是欠缺的。會有這種情形，主要是臺灣長期以來欠缺文學養成教育無健全所致。按呢講，並毋是咧譬相參賽者，是「愛之深，責之切」，我向望咱的文學發展，會逐著華語文學，甚至有一工會當參華語文學比並，攏成做臺灣文學的主流。教師是咱推動本土母語上重要的資產。因為目前有法度讀佮寫母語文學的階級是教師階級。教師階級對母語的掌控有一定的熟黃度，對技巧、形式的經營有一定的能力，對創意的藝術有一定的認知，才是咱推動母語有力的武器。我時常咧講：一首好詩、抑是一首傑出的詩，是需要語言藝術佮主題思想的高度結合。一篇／首文學作品需要有情感、思想深度，同時嘛需要語言技巧來做載體，閣加上愛有藝術創意。這需要定定觀摩、閱讀好的作品、閣愛觀察人的生活、思考藝術的經營才會當精進的。我深深期待這工足緊就會來到。

　　這屆參賽詩作的主題真多元。其中以抒情的、地誌詩、親情的主題上濟。這值得肯定，表示咱對咱徛起的土地有深刻的情感。另外，值得提起的是對歷史人物的書寫，這部分大多數寫了真好。其他的主題猶有對社會關懷、歷史的沉思、生態的保育等。
下面就頭3名的作品做一个簡要的評審報告：

　　第1名的〈親像，一蕊火〉是咧描寫臺籍老兵，特別是許昭榮的故事。這首詩的語言成熟，情感的吞吐有節制，佇控訴當中看見希望，是描寫臺灣老兵難得的佳作。節錄一葩予逐家欣賞:

無光，寂寞的無奈紀念碑
燭花強欲焦蔫
碑石的霜冰你明白，五月
港邊城市初夏，斑芝樹葉攏落
落塗，孤寒一陣一陣
瘦瘦的身骨猶原欲攬抱燦爛的
堅定，爆放花穎的光焱
你，開做焚烈的火蕊
照佇烏陰的所在

　　第2名的〈愛河〉是描寫高雄氣爆事件的作品。這首詩的語言也真成熟，情感也真有節制，以愛河為名，對這个南方都市的未來有充滿「浴火重生」的向望，是描寫高雄氣爆事件難得的佳作。節錄一葩予逐家欣賞:

就算早慢總有一工
所有同情ê口氣kap批評ê喙瀾攏會親像風湧消退
我猶原佇遮陪伴
Kap你做伙度過這場炎火ê淨化大水ê洗禮
繼續用愛
為你治療傷疼等你復原重生

　　第3名的〈苦旦─寫予廖瓊枝〉，佮第1名的詩作仝款，是一首人物詩，描寫臺灣第一苦旦廖瓊枝的一生。對廖瓊枝細漢的坎坷，中年的功成名就，到老年的回想，詩的語氣平淡，毋過情意深沉。語言有歌仔戲彼一般的音樂性，是一首佳作。節錄一葩予逐家欣賞:

你敢聽會出來?這首
覕喙的哭調仔，也有一寡
薄縭絲的願望，也有
圓滿的可能。這首
覕喙的哭調仔，雖然悲傷
總嘛有溫柔的向望
總嘛有祈禱佮光明

2016/2/14臺南永康