短篇小說
《社會組》
第一名 林彭榮《過年》
當歡喜得著評審个肯定。
這篇係寫老人安養个問題，俗話講：「爺娘想子長江水，子想爺娘擔竿長。」自古以來，爺娘對子女个愛，遠遠超過子女關心爺哀个心。
語言係文化个根頭，係族群个標記，無語言，就無文化。希望客家人，做得摎自家知个，自家想个，用客語文字表達出來，大家共下來打拚，豐富亻恩客語文學。
現職：退休教師
第二名 黃宏春《金銀花》
第一擺用客語寫文章，正知恁困難。
因為平常慣用華語，構思乜用華語，轉成客語嗄愛想去想轉看有適當無，這就隔了一層。
成時，想著當湛个客話嗄尋毋著對應个語詞，或者電腦打毌出常用个字，像「亻恩」摎「亻恩」，這又隔一層。亻恩係經過年零，正從別儕在網路頂个文章「拷貝」過來這兩隻字。用客語寫文章，感覺有盡高个門檻。
做得得獎，分亻恩盡大个信心，承蒙，感謝！
第三名 余惠蓮《有緣有分个新故鄉》
其實這篇作品，是我家族的真實故事。幾年前，跟著阿爸參加同姓宗親的旅遊活動，其中一位四十歲左右的女性，無論上、下車或者用餐，她都非常熱心的為大家服務。我想她並非遊覽車的服務人員，對這號人物，我真的不知道她的身分。但是因為她的熱心服務加上流利的口才，引起我的好奇心，座旁的伯姆告訴我，這位女士是印尼嫁過來，我該喊她「叔姆」。第二天，我開始和她走在一起，和她談了好多事，許多宗親長輩，也都對這位印尼媳婦，為家庭、社會的付出，讚賞有加。
臺灣的男性，很多和外國女人聯姻，因為生活方式、文化背景的不同，有不少婚姻無疾而終，以離異收場。如果我們的社會，能真心的為這些外配設想，彼此真誠的相處，讓她們慢慢地融入臺灣在地的生活。久而久之，臺灣這個新故鄉，也是她們奉獻心力的地方呢!
現職：退休人員
客家語短篇小說社會組評審感言 / 江昀
爺哀教恩个話
三組投稿裡背，社會組个投稿盡熱烈，表示社會人士對自家語言个文字化，緊來緊認同，這係當好个現象，入選名額單淨三名，這肚項還有當多好文章，無法度選入來，實在異打爽，今年選出三篇盡量擇主題較無共樣性質个文章，較多元有變化，分下一屆想參加个作者有較多个思考空間。
「有緣有分个新故鄉」這篇雖然寫个係印尼來个新住民，文學性較無罅，小說技巧吂熟，乜無麼个變化轉折，毋過社會描寫同肯定新住民个精神當正面，毋會怪怨無是非，用感恩个心對待自家个命運，值得鼓勵摎學習。「金銀花」這篇較有小說个味緒，客語文運用異好，語詞當淨俐，對話有較澀兜仔，人物異有鄉土味，做得分讀者看著自家个童年經驗，客語文采當靚，前後文又鬥搭，乜有文學性，值得分享。「過年」這篇反應時代現象，描寫現代人个生活經驗，歸篇文章跈等過年个氣氛行，主題性異好，乜有討論著新一代个老人照護問題，時代無共樣哩，大自家乜愛學習新頭腦，過新生活，雖然有當多無奈何个事情，乜愛跈得著時行，分自家一條路乜分大細一條路好行，心寬路就闊，毋好單淨知愛仰般寫遺書，還愛學習仰般規劃自家个老人生活計劃，愛生活到有尊嚴，就愛食到老學到老，盡尾一句收到當靚，一句話兩面鏡，值得欣賞。
這擺整體个作品，尤其對社會組同教師組，還有當多進步个空間，就這兩組，評審提出共同个建議，乜請學生組个後生人參考學習：
第一、投稿者愛緊開拓議題个多樣性，毋好緊寫就係老頭擺，就算愛寫老頭擺乜愛開拓新角度，加入關懷、人文、甚至批判。
第二、終究係客語文學獎，毋單淨愛用客語寫出心肚个話，還愛思考仰般經營作品个文學性，釅茶總比白滾水較餳人啉。
第三、散文、小說文體愛有區別，毋好寫小說寫到像散文或者像講故事，寫散文又顛倒像寫小說，變成虛構散文失去真實性。
第四、鼓勵直接用客語思考來創作書寫。一篇客語原創作品，贏過翻譯自家華語思考个作品。無論對客語文學長期个生根發展，抑係對創作者個人來講，做得用自家个客語能力直接就寫出作品，比得著第一名較有價值。雖然對後生人、學生仔會有一息仔挑戰，還係鼓勵後生人多練習，毋係為著一擺个比賽定定。平常多講客話養成習慣、乜做得用客話讀書報、想著麼个就記下來，總會一擺一擺緊進步，評審會看得出後生人求進步个心。毋過，係對社會人士或者教師組个作品，評審一定會細心細意批評，就請亻恩俚大人共下自我要求哦。
第五、主辦單位个宣傳，愛大大加油，毋係網路或者新聞稿放出消息就好；愛多樣性宣傳、辦研習營增加想接近亻恩俚客語文閱讀、書寫、創作个人口，運用傳播媒體，一擺又一擺宣傳、炒熱文學獎議題，正會有較多人興意參加。
根據聯合國教科文組織在2011年11月發佈一份研究報告，在21世紀結束進前，全世界單淨會伸幾種強勢語言留下來定定，其他多數个弱勢語言會消忒，客話在臺灣係少數族群，亻恩自家客家人毋煞猛救自家个阿姆話，無人會替亻恩爭取，寫一篇算一篇，至少乜做得摎亻恩俚个客家文學留下來做古董，絕對做毋得分在臺灣生活過个客家人、客家文化，在亻恩有文字个這代人圓身項打毋見忒。希望大家做得共下煞猛打拚，用爺哀教亻恩个話，留下一息仔亻恩在這垤土地項生活過个腳跡摎尊嚴，弱勢个語言，無悲觀个權利，希望雲開天闊，客家前途一片光明。
2016.1.7在大墩木棉樹下
