閩南語散文教師組評審感言 / 中山醫學大學臺語文學系副教授 何信翰

　　文學作品會當分做「內容、語言、文學手路」等3个面向─親像內容的題材敢有創新？敢會予人感動？敢有表現出在地／個人的特色？語言的運用敢有適當koh媠氣？臺語的使用敢有標準？使用的文學手路敢有符合主題？敢有充分表現特色……等等。這遍教師組的作品，佇這幾方面算是攏有相當的水準，嘛因為職業的關係，整體來講臺語書寫的正確度kap流利度攏真袂䆀。會當講教師組是整體來講，水準上「tsiâu」的一組。

　　這遍得獎的作品，第一名和第二名的作品攏是透過回憶和序大人的相處，紹介故鄉人文地理，抒情兼寫景。第三名的作品寫的是訓練學習弱勢學生參加演說比賽的過程，充滿對弱勢的關懷。三篇攏是真成熟的作品。

　　總是佇對投稿作品題材的多元和手路的成熟歡喜的仝時，uì這遍的投稿人數kap分佈，suah也會當看出一寡臺語文學未來發展的隱憂：這遍參加比賽的稿件內面，社會組占beh一半，教師組和學生組加起來，tsiah比社會組加3篇niā-niā。連續幾屆來看，學生組kap教師組的投稿數量suah有減少的趨勢。是毋是kap臺語文相關系所佇臺灣的沒落，iah是規个臺、客語教育佇教學現場的使用減少的情形有關係，值得主辦的教育部注意。

　　最後，這遍散文組3位評審之一的廖瑞銘教授，佇評審的過程身體就一直欠安，評審工課結束了後無幾工suah雄雄來過身。佇遮也向一世人為臺語文學拍拚的廖教授致上敬意kap追思。