客家語現代詩教師組評審感言 / 陳寧貴

豐沛多彩个客語現代詩

1  種 — 寫分高雄氣爆受難家屬

　　這首客語現代詩盡有創意，一開頭恁樣寫 ---「揀起一皮焦黃个葉仔/ 在烈火燒過/ 熰火冷泧以後/ 夾在賁賁字典第七百三十一頁當中/ 密密幼幼个字係大大細細个沙石」--- 無論文字運用抑係氣韻，一下間吸等讀者目珠，事件雖然過去一段時間，共樣分人心肝頭忍毋核个感傷 。 第二小段 --- 「毋知幾久 /上心个葉仔又係一片青里里 /毋知哪時/  晁晁个樹尾又綻出嫩習習个芽苗」----寫出盡大盼望，最尾講---「種落相思个樹/ 結出苦楝仔籽/ 華華个月光又會照耀四方  /晟眼个春光日又會轉到人間」-----這係這首客語詩《種》畫龍點睛个主題，對事件深沉犀利觀察，書寫个形式表現盡有現代感，內容提出新境界。

2  爾有聽著花開个聲音無

　　這首詩開頭就恁樣問：「爾有聽著花開个聲音無？」分人感覺淰淰个詩意，第一段問企在該田中央个農夫阿伯，農夫阿伯講：「無！無聽著花開个聲音！斯有落雨个聲音，落到田肚个聲音，還有心肝肚歡喜靂天个聲音。」寫出農夫阿伯心肝肚真實个聲音，佢聽落雨个聲音，贏過聽著花開个聲音。第二段寫愐著阿姆輕輕揞睡目个聲音：「像油桐花開个聲音，輕輕个，軟軟个，柔柔个，緩緩个，聲音恬恬行到身邊。」係盡登珍个描寫。第三段續等﹝接著﹞第二段寫愐著阿姆油桐花開樣敨氣聲，問自家有聽著花開个聲音無，摸等个心輕輕回講：「有！」佢又輕輕个問：「有鼻著該香緒無？」這時節作者既經聽著花開聲摎鼻著花香味緒，毋過「花開个聲音哪時又渡走春天咧啊？」懷念起阿姆又一陣感傷。本詩書寫有新意，第二段同第三段意象較統一，感動讀者心神。另：鋤頭係钁頭毋係鑊頭 。

3 阿姆个聲

　　這首客語詩用阿姆个聲音來懷念阿姆，係盡有創意，過再將阿姆个聲音詳細分：「軟軟 、尖尖、 扁扁 、 彎彎」乜盡有特殊性。 麼个係阿姆个軟軟聲音？原來係還細時節：「阿姆个聲 ，軟軟，揞呀揞， 拍呀拍 ， 軟軟个聲就像會拐人樣仔，目珠跈等就眨下來，佢軟軟甜甜」，讀來燒暖動人。麼个係阿姆个尖尖聲音？該下係用來嚇賊。麼个係阿姆个扁扁聲音：「阿姆个聲音 ，扁扁，阿爸半夜正轉屋，間房肚兩儕冤家，扁扁个聲在門縫項鑽出來 」，盡有想像力同趣味性。麼个係阿姆个彎彎聲音：「不管路行幾久 ， 離家幾遠 ，耳公脣就係有佢會轉斡个聲，寒了愛著衫， 錢毋罅愛講，彎彎个聲跈到若無結無煞」，寫出阿姆个偉大，無時無刻對子女个關懷。本詩有息把散文化，好在最尾這句：「阿姆个聲  ， 無聲」，一下間詩味全部湧出來，斷真無聲贏過有聲个千思萬念。

結語

　　這屆參賽客語現代詩，毋單只客家族群，別个族群乜來參加。客語分較多社會大眾關心學習來書寫係盡好現象。這擺參賽作品大致水準當好。毋過，名次有限，難免遺珠之憾。參賽作品雖然有華客夾雜，用毋堵好客語字，感覺毋罅原汁原味，但係瑕不掩瑜，作者未來創作量增加後，定著會改善這兜缺點，使得作品客語文字過較精準。