現代詩
《學生組》
第一名 張捷明《時間个重量─𠊎讀渡臺悲歌》
轉到學校從頭拿起課本後，選修了一堂民間文學，一開頭就讀了一篇「渡臺悲歌」──「勸君切莫過臺灣」，再讀一堂移墾史，開頭又係一篇「閩粵械鬥」、「漳泉械鬥」，算來先民移墾臺灣係為著麼个？仰般會留下恁多个遺憾？
讀了這兜幾百年來个歷史，到底亻恩俚兜有學著麼个教訓無？有較和挼、較進步無？讀忒歷史除忒道嘆，亻恩希望一百年後个子孫重寫一本新个臺灣史，會記載亻恩這代臺灣人所有个族群都和和挼挼共下打拚，臺灣從此一片春光。
現職：碩士生
第二名 史蘭亭《硬頸个女人》
這首詩，是送給外婆九十三歲生日的禮物。
詩是一氣呵成，字字皆是最誠摯對外婆的感情。
我的客語是外婆教的。生長在那個時代鄉下的女人，宿命大概是自小在家中幫忙務農或持家，一般無法上學識字。但外婆跟著她哥哥的私塾老師學習，除了能閱報看書，還能朗朗上口四句客家詩聯及山歌。我喜歡聽她中氣十足的朗唱，那些通俗的詩句，讓世紀初那個隱居在層層山巒中的客家村莊裡的人情事故，活靈活現的在眼前上演。
收到得獎消息時，我正在馬來西亞陪伴外婆過年。這個獎，是給全家人的一份禮物，記錄我們對外婆深深的愛。
現職：博士班學生
第三名 曾語嫣《曇花》
這擺得獎，對𠊎來講實在係當大个鼓勵。從細，𠊎為著愛看屋脣个曇花開花，輒常在烏烏个半夜等候，這首詩就係表現𠊎該時候个體會。感謝評判先生對𠊎个肯定，乜感謝吾婆從細就摎𠊎講客，分𠊎認識母語、學習母語个機會。
現職：學生
客家語現代詩學生組評審感言 / 陳寧貴
豐沛多彩个客語現代詩
1 時間个重量 -- 讀渡臺悲歌
這首客語詩係史詩大作：「一直到時間流過，正知讀个係渡臺悲歌，輕輕合起臺灣移墾史，四百頁个命落秤無風恁重，一聲道嘆長過河江」，作者大氣魄想愛寫出四百年臺灣史，用恁短个詩實在擔毋起這渡臺悲歌。「時間有幾多斤重？仰般會將長喃喃个歷史矺到扁扁薄薄，睡到恬靜个壅塵下背」，歷史在一層一層灰塵底肚，作者一頁一頁揙開來，從第一頁， 唐山過烏水溝，六死三在一回頭，到第三十六頁，蟲蛀，第九十九頁，缺角，第......，這係盡無奈个故事，有兜蟲蛀有兜缺角，斷真係一聲道嘆長過河江！作者筆力雄渾，盼望未來能將本詩發展成千行史詩。
2 硬頸个女人
這係一首盡特殊个客語詩，作者註明：「本篇使用之客家語為馬來西亞華僑使用之大埔腔，其中因文化背景混合了其他客語及粵語詞彙。」作者个客語書寫雖然毋係原汁原味，毋過，做得完全看識，知得作者用當湛詩語言，描寫厥姐婆个硬頸偉大，一開頭作者恁樣形容厥姐婆：「妳桃花个鳳眼轉成歲月深深个折痕，一世紀个長篇從亭亭少女个嬌羞，寫到全頭華白个自在，妳一路硬頸，柱等拐杖仍從毋低頭」，作者講厥姐婆頭擺做過「琉瑯女」﹝馬來西亞採錫的一種簡易方法﹞，作者也用巧妙方式，寫出厥姐婆拚命撐起一家燒暖个艱苦：「妳中意食甜，仰般勸妳都毋聽，妳話無味無道毋當莫吃，咖啡愛甜糕點愛甜人生正有影，細阿妹仔个時候食个苦敢係還毋夠？」作者心思細密，寫來絲絲入扣。
3曇花
這係一首盡精緻个小品客語詩作，短短十六行無冗長散文化缺點，單純有味，詩想非凡。一開頭描寫就分讀者鼻著曇花清香味緒：「夜風涼涼，掠過禾仔个甜夢，掠過樹仔个頭毛，掠過一支含等露水个花蕊，香氣芬芳」，作者使用詩語言形容曇花 --- 著等染著月光个白裙，孤栖个在更深夜靜，高貴个走出來，掛等微微个黃色笑容 --- 寫來得心應手詩意盎然，作者係做得分人盡期待个未來客家詩人。
結語
這屆參賽客語現代詩，毋單只客家族群，別个族群乜來參加。客語分較多社會大眾關心學習來書寫係盡好現象。這擺參賽作品大致水準當好。毋過，名次有限，難免遺珠之憾。參賽作品雖然有華客夾雜，用毋堵好客語字，感覺毋罅原汁原味，但係瑕不掩瑜，作者未來創作量增加後，定著會改善這兜缺點，使得作品客語文字過較精準。
