閩南語短篇小說類教師組評審ē話 / 宋澤萊

　　這擺（104年）ê小說徵文比賽，有兩个特點：

　　一个特點是稿件增加。這个特點表示寫臺語小說ê人愈來愈濟，臺語寫作ê人有愈來愈普遍ê現象。也ē-sái講，教育部ê徵文比賽愈來愈[予人]看重，逐家願意共稿件投來tsia ê一个結果。

　　另一个特點是教師組hâm學生組ê水準比社會組有較懸。往年，社會組ê水準總是比老師組hâm學生組懸；現此時情形已經改變，社會組水準顛倒較 kē。這个特點表示，臺語小說ê寫作訓練愈來愈重要。因為社會組ê作者真濟人無經過學院ê訓練，較欠缺羅馬字kap臺灣話ê基礎，致使in寫ê小說內底亂用文字，口語粗俗，水準tō降 kē。可見，現此時想beh創作臺語小說ê人，一定要自求進步，認真學習，千萬毋通認為家己是臺灣人，tō一定ē-tàng寫出好臺文。

　　下面，評審beh對每一篇得獎ê作品做評論。

社會組：

　　　第一名是〈khōng金ê內褲〉。故事寫某一个學校ê網站，拍賣女用內褲ê一件怪事。佇網路頂頭，有賣真濟女性ê內褲。不而過，標價ê時，雖然是女校長ê內褲嘛攏無超過幾百塊，獨獨有一个叫做「春美」ê女學生內褲價數標 káu 8,000塊，實在真驚人。原來春美是校內有名ê美女，所以伊ê內褲變做人人想beh買ê物件。毋過，是按怎春美內褲哪會予人提出來賣neh？原來是有人專門tī-leh偷提美女ê內褲，提tio̍h了後，tsiah提去網站拍賣。因為án-ni，春美所蹛ê房間tsiah ē時常tio̍h賊偷，雖然有向警方報案，卻總是查袂出是去予啥人偷提去。Tī小說上頭前，「我」這个男主角自認是春美ê好朋友，伊時常幫助春美做一寡小代誌，ū-tang-sî-á會當進入春美蹛ê房間。「我」自認家己是正人君子，對春美無偌大ê野心，只是盡心盡意替春美做一寡代誌，伊自認會當幫助春美做代誌是天下間上大ê光榮。不而過，「我」干焦對春美內褲價數愈來愈懸這件代誌有趣味。小說隨著種種情節往前發展，到了結尾ê部分，讀者才突然領悟tio̍h，原來「我」這个男主角tō是專門偷春美內褲去拍賣ê彼个小賊。

　　這篇小說ê文字一流，運用羅馬字ê才調真懸，臺語ê氣味十足，大概是社會組內上好ê一位。之外，佈局ê才調也真懸，tī文章的後壁，tsiah予讀者知影賊偷是啥人，手法真高明。小說情節ê進展也非常合理。雖然小說ê意義毋是真大，但是故事真笑詼，看這篇小說絕對buē感覺無聊。伊得著第一名是當然ê。

　　第二名是〈活欲死欲活〉。這是一篇家庭ê鬧劇，寫一个新婦不孝、囝兒毋肯照顧老母ê故事。這个老母本來hâm囝兒、新婦蹛做夥。當伊年老時，新婦變kah真不孝，常常怨慼少年時予人虐待ê代誌。伊敢當面責備ta-ke，無想beh養飼ta-ke。Ta-ke被逼，只有向新婦落跪，變成街頭巷尾ê笑談。可嘆ê是囝兒hâm新婦徛仝爿，並無保護老母。這位老母有一个查某囝，已經嫁人，做攤仔生理，囡仔已經長大成人，看tio̍h家己ê阿兄、阿嫂毋肯照顧老母，感覺兄、嫂實在不孝，tō𤆬老母去養飼。不而過，伊日時愛出外做小食生理，無法完全照顧老母，到老母有病ê時，tō送老母去療養院養老。後來，病重時，tō送病院。因為病不止仔重，醫生tō認為這个老母已經無救，tō送倒轉囝兒、新婦ê兜準備後事，當然囝兒、新婦對老母ê態度仝款冷淡。不而過，經過三變四變了後，這位老母煞死無去，閣再復活起來，予逐家真tio̍h驚。Tī這个鬧劇內底，查某囝一家人（有孝ê）hâm囝兒一家人（不孝ê）互相用話攻擊對方是小說ê重點，顯示現此時一般臺灣家庭ê問題。

　　這篇小說只是通俗ê鬧劇，並無大意義。不而過，作者臺語非常扭掠，諺語ê運用高明。小說的兩爿對立結構也非常明顯，有緊張性。最後安排老大人死閣復活，會當看出作者ê佈局才調真懸。這攏是這篇小說得獎ê原因。

　　第三名是〈醫學研討會〉。這篇小說寫一个南投醫生，tī藥商ê安排之下，藉著參加「醫學研討會」ê名義，瞞騙伊ê某，到臺北接受色情招待，予筋骨輕鬆ê故事。故事對藥商阿成ê生活寫起，然後寫阿成這位藥商突然接tio̍h林醫師向伊買新藥ê電話，總共買35萬箍，是一筆大生理。不而過，林醫師表示伊看病人真thiám-thâu，希望藥商會當替伊安排三日ê節目，予伊會當放鬆。雙方tō按呢達成協議。藥商阿成趕緊安排兩个假醫生，到林醫生ê厝，tī醫師娘ê面前，藉著欲同齊去北部參加一个「醫學研討會」ê名義，將林醫師𤆬走。經過三日ê逍遙，林醫師tsiah輕鬆轉來。林醫師第一擺欺騙伊ê某猶算順利，第二擺tō予伊ê某發現，引起翁仔某相罵，最後演變做無法度收拾ê後果。小說ê重點落tī按怎欺騙醫師娘ê過程hâm方法頂頭，帶予讀者真大ê趣味，ná-tshin-tshiūnn看tio̍h某人ê私密生活，大開眼界。

　　這篇毋是假影ê小說，應該是真實性真懸ê小說。因為作者對藥商ê行為真正呢內行，欺騙醫師娘ê方法寫kah真詳細，也寫kah合情合理，假使毋是內行人，絕對無法知影tsia--ê細節。這是這篇小說第一个特點。閣來，作者ê描寫能力（對人物面貌hâm場景ê描寫）雖然毋是真好，但是敘述才能真懸，講故事有條理，清楚扭掠，讀起來真爽快。這是第二个特點。另外這篇小說有社會教化ê意義，予咱看清楚翁仔某之間袂使得有欺騙，若無，一定會變kah無法度收山。這是第三个特點。Tsia攏是得獎ê原因。