閩南語現代詩類學生組評審感言 / 方耀乾

　　104年臺語新詩類學生組總共有73篇參賽，比頂一屆30篇較加43篇。由3位評審委員李勤岸、林淇瀁 (向陽)、方耀乾，佇2016年1月7日下晡，踮中央聯合辦公大樓18樓舉行決審會議，最後選出前 3名的作品：名次分別是第 1 名〈民族戰爭〉、第 2 名〈蘆竹之歌〉、第 3 名〈打狗海湧頂懸ê光〉。

　　這屆的文學獎的評分標準的項目分別是: 一、母語使用能力，佔40%；二、結構佮修辭，佔15%；三、內容豐富性，佔15%；四、內容流暢度，佔15%；五、內容創意性，佔15%。會設定頂面的評分結構，這是會當理解。這个文學獎對母語使用能力的要求佔上懸，原因是長期以來臺灣的教育體系裡臺灣母語並毋是主要的教育語言，大多數人的母語書寫能力無好，所以要求這種上基本能力是必要的。好佳哉，這屆社會組參賽的詩作普遍來講，臺語的語法佮語詞有比以早較端的，這表示母語的推動佮教育對語文的書寫有一定的正面影響。

　　佮頂一屆的情形仝款。雖罔語法佮語詞的運用有比以早較端的，不而過，咱發現詩的質素並無大大提升，這也表示咱的文學教育猶是欠缺的。會有這種情形，主要是臺灣長期以來欠缺文學養成教育無健全所致。按呢講，並毋是咧譬相參賽者，是「愛之深，責之切」，我向望咱的文學發展，會逐著華語文學，甚至有一工會當參華語文學比並，攏成做臺灣文學的主流。教師是咱推動本土母語上重要的資產。因為目前有法度讀佮寫母語文學的階級是教師階級。教師階級對母語的掌控有一定的熟黃度，對技巧、形式的經營有一定的能力，對創意的藝術有一定的認知，才是咱推動母語有力的武器。我時常咧講：一首好詩、抑是一首傑出的詩，是需要語言藝術佮主題思想的高度結合。一篇／首文學作品需要有情感、思想深度，同時嘛需要語言技巧來做載體，閣加上愛有藝術創意。這需要定定觀摩、閱讀好的作品、閣愛觀察人的生活、思考藝術的經營才會當精進的。我深深期待這工足緊就會來到。

　　這屆有一个特殊的現象是大約有二、三十首詩的逝數干焦20逝左右，可能是初次參加新詩比賽的學生，較無經驗，毋知鋩角。因為這屆徵稿逝數限60逝以內，大多數的參賽者攏會寫四、五十逝左右。毋過遮的詩作的臺語猶算端的，這值得安慰，向望怹繼續寫落去，下一屆閣來投稿。

　　這屆總共有73篇參賽，比頂一屆30篇較加43篇。這是一件予人歡喜的代誌。對大學生來講(假設學生組的稿件大多數是來自大學生)，亻因是真真正正有受過六冬母語教育的世代，會比頂一屆突然加出遮濟人參加，當然是予人歡喜的。

　　這屆學生組詩作的主題以地誌、親情、抒情、愛情的主題上濟。其他的主題猶有對社會關懷、性別議題、歷史的沉思、生態的保育、歷史人物的書寫等。

　　下面就頭3名的作品做一个簡要的評審報告：

　　第 1 名〈民族戰爭〉是一首性別議題的詩作，控訴佇Bosnia、Kosovo、East Timor戰爭當中女性受侮辱、姦殺的事件。這首詩的語言端的直接，對父權的批判就若像刺刀仝款。這首詩的主題，對臺語詩來講，是難得看見的。咱向望愈濟人來書寫無仝的主題，開拓新的書寫領域，按呢臺語文學才會壯大。較可惜的是，這首詩雖罔語言成熟清氣，毋過表現出來的恨意傷大而且直接，情緒的收放會使閣較注意一下，按呢會閣較耐讀。節錄上頭葩予逐家欣賞:

In竟然對阮宣戰
Tsiah-ê查埔人明明知
阮bē-giàn hiù in sann爭國父ê戰爭
In suah kā阮ê身軀畫做前線
瞄準阮ê腹肚尾
假設hia是死對頭ê巢窟
Blitzkrieg!!!
暗殺「殺!殺!」
Tuì阮ê下身tsiūzk陸
Lān鳥ná規師ê thàng-kah
Kauh過生門，衝破阮ê tsi-bai
起tshio gia̍h直ê大支lān
無數枝大砲刺刀反光
Tsha̍k-thàng過阮ê處女膜
Tīng koh冷ê陰道掃射
Thàng到上深底ê子宮
防空壕碎糊糊
血tuì阮ê kái邊tshuah流
護城河ê水tò河 kah紅濁濁
粘koh siûnn，規攤野獸的臭hiàn
魔鬼陷眠ê笑聲kàn-kiāu聲
阮ê民族戰爭ê記tî
規段走光無聲

　　第 2 名〈蘆竹之歌〉是一首控訴日本徵調慰安婦上戰場的詩作，主要透過描寫5位慰安婦的過去來呈現時代的悲劇。這首詩語言成熟，篇章安排媠氣，情緒的敨放收縮自然，是非常成功的作品。節錄一段予逐家欣賞:

有時日頭溫馴，一寡已經明朗的
心事，就曝佇遮爾溫暖的時間內底
家己安慰，家己惜命命

有時風透，天色深濁
曠闊的坡地攏是肅穆的跤跡
舊陋的路草，茫渺的心坎
往事彎腰跔佇無言無語的沙塗

有時風勻勻仔娑過面，柔軟的天
輕聲細說的土地，遙遠的山崙彼爿
傳來絲絲仔的芳氣，按呢
我才會當確定: 現此時，我已經安全
佇遮，佇我家己，新生的身軀邊

　　第 3 名〈打狗海湧頂懸ê光〉是對南方，也就是本土語言、文學、文化的禮讚，其實也是一種期待，期待臺灣文藝的復興。語言成熟，意涵飽滇，文字有節奏，結構妥當。可惜的是兩葩詩之間的牽挽無峇。節錄一段予逐家欣賞:

踮佇烏色的ê海湧內底
阮敢若看著會使依倚ê海墘
帶著南方ê燈火欲來撥開北方ê寒冬
原來彼爿早就有一群人
咧用草仔色ê電火延續島嶼ê智慧
咱攏是南方來ê人

搝出藏佇夢想內底ê彼一條路
語言毋是武器
是一條按怎將逐家圍做伙ê袚鍊
毋免展風神
只要會使徛佇時間ê舞臺，毋免有節日ê慶祝
只要會使徛佇落雨天
看著臺文路ê路標佇阮ê目睭內底

2016/2/16臺中教育大學求真樓