現代詩
《社會組》
第一名 陳利成《你的面是一區拋荒的田》
母語，是族群的性命。每一種母語，攏是世界無法度替代的資產，若消失去，毋但是國家的悲哀，嘛是人類永遠的拍損。這馬，臺灣各族群的母語攏面對滅亡的危機，向望咱政府珍惜多元文化，佇十二年國民教育體制內面，有計劃進行母語保存、推廣的工程，毋通予下一代囡仔怨嘆佮遺憾──咱這代大人變做毀滅母語的兇手……＜你的面是一坵拋荒的田＞是描寫親情的詩，兼咧探討性命的問題，序大人，是咱一世人修行的功課，今生前世，執迷抑是了悟，攏是永遠無法度割捨的牽連，感謝評審先生的目睭，予一坵拋荒的田，有淡薄仔日頭光佮向望。
現職：藝文創作者
第二名 杜信龍《老》
我開始寫臺語是tsit幾冬ê tāi-tsì，是為tio̍h欲kā臺語留--落-來。Gún老母老爸無學歷，毋捌字，kan-tann ē-hiáu講臺語。四khoo-lê-á lú來lú少人leh講臺語，in tshan-tshiūnn變啞口，我無法度理解tsit款ê社會，tsit款 ê「國家」，koh有tsē-tsē ê 「讀冊人」phí-siùnn講母語ê人。我ka-tī mā感覺真見笑無法度來做siánn來改變。所擺，開始gia̍h筆寫，讀，近年koh開始收藏臺語冊，是用1種寫遺書 ê心情，khioh少年ê記持，走tshue熟似 ê話語聲調。Tsit種心情，你m̄知會體會--無？Nā會，你tio̍h緊來鬥kha手，mài看戲。
今年(2016) koh tsit pái政黨輪替，雖bóng歡喜，但是iû-guân驚惶。轉型正義欲án-tsuán正tshui-sak，lán目tsiu peh hōo金看hōo明，語言平等法何時tsiah會立法，保證tsē-tsē母語kap文化，nā無，咱辦文學獎是leh辨心酸--ê niâ。「閩南語」tsit ê詞，我無欲承認，我老爸老母講 ê話tō是臺語，in毋捌siánn是「閩南語」。Lán知「臺語」kap「閩南語」正名 ê 爭論tsiânn久--ah，lóng知知是政治者leh使弄，無，明仔載你硬叫我ê名改做「Má Eng-káu」，我kám tō ài改名？你ka-tī ài叫siánn 無人會kā你擋，總是，你橫霸án-ne要求別人，kan-tann是流亡殖民政府 ê手段niâ，thong人看現現。
偏激？摸ka-tī心肝，問ka-tī對臺語史了解guā濟，臺灣歷史有guā濟？我kan-tann ǹg-bāng tsit日臺灣人有尊嚴講母語，了解ka-tī ê土地，疼惜伊，án-ne lán tsiah會做ka-tī ê主人。
2016/2/21
現職：工程師
第三名 王宗仁《山佮海》
寫這首詩的時陣，是感受著山佮海的變化，就親像咱對心內校對往過的錯失佮稀微。
母語，是無法度替代的資產；用母語記錄人生是真重要的代誌。感謝評審老師的肯定，聽著我心內的聲音，日後我會更加認真寫詩。
現職：文化工作
閩南語現代詩類社會組評審感言 / 方耀乾
104年臺語新詩類社會組總共有54篇參賽，比頂一屆72 篇較少18篇。由3位評審委員李勤岸、林淇瀁 (向陽)、方耀乾，佇2016年1月7日下晡，踮中央聯合辦公大樓18樓舉行決審會議，最後選出前 3名的作品：名次分別是第1名〈你的面是一坵拋荒的田〉、第2名〈老〉、第3名〈山佮海〉。
這屆的文學獎的評分標準的項目分別是: 一、母語使用能力，佔40%；二、結構佮修辭，佔15%；三、內容豐富性，佔15%；四、內容流暢度，佔15%；五、內容創意性，佔15%。會設定頂面的評分結構，這是會當理解。這个文學獎對母語使用能力的要求佔上懸，原因是長期以來臺灣的教育體系裡臺灣母語並毋是主要的教育語言，大多數人的母語書寫能力無好，所以要求這種上基本能力是必要的。好佳哉，這屆社會組參賽的詩作普遍來講，臺語的語法佮語詞有比以早較端的，這表示母語的推動佮教育對語文的書寫有一定的正面影響。
佮頂一屆的情形仝款。雖罔語法佮語詞的運用有比以早較端的，不而過，咱發現詩的質素並無大大提升，這也表示咱的文學教育猶是欠缺的。會有這種情形，主要是臺灣長期以來欠缺文學養成教育無健全所致。按呢講，並毋是咧譬相參賽者，是「愛之深，責之切」，我向望咱的文學發展，會逐著華語文學，甚至有一工會當參華語文學比並，攏成做臺灣文學的主流。教師是咱推動本土母語上重要的資產。因為目前有法度讀佮寫母語文學的階級是教師階級。教師階級對母語的掌控有一定的熟黃度，對技巧、形式的經營有一定的能力，對創意的藝術有一定的認知，才是咱推動母語有力的武器。我時常咧講：一首好詩、抑是一首傑出的詩，是需要語言藝術佮主題思想的高度結合。一篇／首文學作品需要有情感、思想深度，同時嘛需要語言技巧來做載體，閣加上愛有藝術創意。這需要定定觀摩、閱讀好的作品、閣愛觀察人的生活、思考藝術的經營才會當精進的。我深深期待這工足緊就會來到。
另外，這屆總共干焦54篇參賽，比頂一屆72 篇減少18篇。這是一个警告。母語文運動佮教育已經經過遮濟冬矣，結果寫作人口並無增加。這一定某一个環節有出問題，值得咱好好仔來思考。
這屆參賽詩作的主題以地誌、親情、抒情的主題上濟。其他的主題猶有對社會關懷、歷史的沉思、生態的保育、歷史人物的書寫等。
下面就頭3名的作品做一个簡要的評審報告：
第1名的〈你的面是一坵拋荒的田〉是一首描寫蹛院的老爸的作品。這首詩的語言運用自然成熟，半帶剾洗、半帶毋甘，寫出人生的意味佮哲思。節錄上頭葩予逐家欣賞:
麻藥退了後
藏佇心肝底的 記持
煞對目墘，直直傱出來
一路共你追殺
惡夢，閣徛佇額頭
咧偷笑，原本焦涸涸的
圳溝，小可仔 澹濕
毋過，彼隻老鐵牛
已經拖袂振動
春天的 向望
第2名的〈老〉是一首描寫面對生死的自我對話，有深沉的哲思，趣味的詩想。語言運用成熟，運筆自然順勢。節錄一葩予逐家欣賞:
狗螺á聲收suah
完成1場哲學想像
心肝koh sió-kuá tám-tám
Kā līng--去ê kha手關節tsūn-tsūn leh
Tiàu tuā-tâng封鎖三魂七魄
Tī時間堅凍進前
Kám ē-sái加添kuá色水
第3名的〈山佮海〉以山佮海的對話，講出山海之間的互相倚靠纏綿。詩想奇特，語言飽滇，可惜兩首組詩之間牽挽無夠絚。節錄一葩予逐家欣賞:
彼是佇咧搖櫓撥開時間的聲音內底
發現水藍色的家己
原來也有魚鰓
會當學大海的聲說自底呼吮
而且到吐詩句
又閣經過幾偌个夢境仝款的海湧
你會得發覺，燈塔咧欲颺起目眉
當倒潮尾後
海灘頂的蟳仔螺仔排列成樂章
2016/2/15臺中教育大學求真樓
