散文
《社會組》
第一名 王永成《蟮蟲仔》
一冬來，tsiânn認真用臺語佇FB發表詩文，是抒發，是交流，也是自我訓練。
寫過幾若篇關於蟮蟲仔的詩文，有華語，臺臺語，也有華語臺語日語混合的。
細漢時陣，上課講「國語」，下課轉來就講臺語。阿爸阿母的臺語裡時常摻「臺式日語」，趣味趣味。另外，我真愛看布袋戲，內底的口白一直到tsín，猶閣會佇頭殻內踅來踅去。
這篇文，藉一隻蟮蟲仔，追揣細漢到青少年時期，對先父的記持。文章寫完，目屎也tsha̍p-tsha̍p tin，阮某問講是咧háu按怎，我嘛講袂出來。
感謝評審老師的肯定，予我對臺文創作更加有信心。
現職：文學、藝術創作
第二名 陳利成《天漸漸光，新中街》
母語，是族群的性命。每一種母語，攏是世界無法度替代的資產，若消失去，毋但是國家的悲哀，嘛是人類永遠的拍損。這馬，臺灣各族群的母語攏面對滅亡的危機，向望咱政府珍惜多元文化，佇十二年國民教育體制內面，有計劃進行母語保存、推廣的工程，毋通予下一代囡仔怨嘆佮遺憾──咱這代大人變做毀滅母語的兇手……＜天漸漸光，新中街＞這篇內面有愛情、親情以及對故鄉的思念之情，人就是按呢，感情複雜甲連家己嘛無法度按算，人生，不如意敢若才是正範(pān)的風勢，感謝評審先生的手，佇春寒風冷的暗暝，領引一條溫暖的小路。
現職：藝文創作者
第三名 洪協強《趁外路仔》
這是我頭擺參與臺語文這坵(khu)田園的耕作，講誠實(tsiânn-si̍t)，真正有夠歡喜--ê。尤其是會當用家己的母語寫細漢時佇故鄉趁外路仔的點點滴滴，上重要的是閣有著獎，khí-moo-tsih不止仔婸(giang)--ooh！
雖然有著名，毋過寫起來猶閣有小可仔㧎㧎(khê-khê)，土想一下可能是咱自細漢就去予華語文來控制的款。也就是按呢，講臺語、聽臺語是無啥物通好臭煬(tshàu-iāng)--ê，不而過若是有才調用臺語來寫文章，就小予我風神一下！咱嘛莫閣去譬相(phì-siùnn)佇講臺語會去予老師處罰的年代大漢--ê。這馬，就先予我家己一个噗仔聲，順紲呵咾(o-ló)一下，總是家己褒，較袂臭臊。
感謝評審的肯定，嘛向望愛咱臺灣的新政府逐年攏有文學獎的徵文活動，名額佮獎金嘛會使閣提較濟、掠較懸一屑仔，鼓勵濟濟愛臺語的人參與徵文活動佮提高著獎的機會。
現職：蘭陽技術學院 校安教官
閩南語散文社會組評審感言 / 中山醫學大學臺語文學系副教授 何信翰
臺語定會予人認為kan-na會當寫古早的代誌、庄跤的代誌、悲情的代誌。事實上，用文學的角度來看，雖罔無仝語言的作品定會有無完全相仝的慣用寫作技巧，總是用啥款語言kap beh表現啥款題材這2項代誌中間，並無絕對的關係。佇這遍社會組投稿的作品內底，咱會當看著各種無仝的題材─有透過細隻蟲豸寫對序大人感情的；有都市上班族的心情記事的；也有紹介故鄉特殊行業的……，會當講是非常多元。這是真值得歡喜的現象，代表臺語文學的發展，已經有相當的成熟度，會當發展出無仝多元的題材。
佇書寫的手路方面，社會組的文學技巧整體來講也攏真成熟，無仝方向的作品，會配合適合家己的手路。咱uì得獎這三篇就真清楚看會出來。
數量方面，這遍咱散文組參加比賽的稿件，社會組就占欲一半。連續幾屆來看，社會組的投稿數量穩定，說明社會大眾對臺語文學的創作，有袂䆀的氛圍。
事實上，佇這幾年有袂少臺語作家投稿以華語作品為主的各種文學比賽，表現完全無輸華語的作品，顯示戰後臺語文學發展到tann，已經有豐富的成果。
最後，這遍散文組3位評審之一的廖瑞銘教授，佇評審的過程身體就一直欠安，評審工課結束了後無幾工suah雄雄來過身。佇遮也向一世人為臺語文學拍拚的廖教授致上敬意kap追思。
