第二名 黃美貞 《遶山》

      用客語來寫生活，生活緊來緊生趣。
      頭下碼愛感謝評審先生个肯定，做得得獎乜愛感謝屋下人个支持，特別係吾老公，雖然佢毋係客家人，毋過佢當鼓勵𠊎用客語來寫作。
      這篇遶山，係同老公共下去遶山个生趣事，佢煞猛安排行程，𠊎就煞猛來共下行，無想著做得變成一篇散文，賺著健康又得獎，實在還歡喜。

《作品賞析》

      自從倈仔去外地讀書，屋下淨伸𠊎兩公婆定定，逐禮拜六盡重要个頭路就係去蹶山，毋多知仔，就蹶了兩十零座山仔，在手機仔个APP紀錄，看得著去過个所在，相簿乜有異多在三角點擎鐵牌仔个相片，細細个成就感漸漸仔在心肝肚暴芽 。
      親山步道就係分大家接近山林，輕鬆散步个路線，比起古道，簡單加異多，故所，逢著尞日，大家相湊去遶山花，照等手機个路線來達到自家个目標，就變成一個潮流。後生个爺哀帶細孲仔共下行，吂會行路个就用背帶背在面前，細人仔做得用目珠來看轉个風景，係睡忒哩，就用背帶背在背囊項，細人仔个心肝前貼等爺哀个背囊，輒常睡到凝覺，有罅得人惜；有兜仔正學行，就用牽个，緊行緊講，緊行緊教，路脣个花草，變成自然个教材，比將講：「蝦公腳會黏人哦！

– – – – – – – – – – – – – – – – – – – – – – – – – – -《閱讀全文》

  第三名 徐瑞香 《轉屋下》

      「不變即變」，所以，用心生活，學習自在。
      苗栗三義，於我，是個慢活的山城；於父親，是生養他的故鄉。三義祖厝，於我，是逢年過節，問候爺爺奶奶的老屋；於父親，是他心心念念，至親撫育他與手足成長的家。
      時間流逝，家也淡出記憶。父親說過，父母離世，老家就不在了。而今，眼中所見，祖厝兩旁的土地易主，蓋出新樓房，老屋被陌生的左鄰右舍夾擊。眼看著老家祖產，不斷縮減，徒增的是無奈不捨‧‧‧‧‧‧
      來不及問父親，我們居住五十年的老房子，儼然成了危樓，比我們晚建，屋況良好的房子，屋主都願意拆遷了，為何父親與老鄰居還要向市府陳情，寧守舊屋，也不要豐厚補償，搬遷他處？
      當都更的號角響起，怪手日夜不斷地千敲萬擊，站在知天命的起點，望著現在居住的家，被殘垣斷壁包圍，家成了瓦礫海中的孤島，島上的我已無父親陪伴。失了根，我似乎懂得父親與老鄰居的堅持了‧‧‧‧‧‧在倖存的年邁屋舍中，想問父親，是否屋在人在，人在情在？最終不願的，可是記憶情感被格式化？
      客語，從小與父母講的語言，親切熟悉。可是隨著長輩凋零，沒有肩負語言傳承的使命感。但，心裡卻又想方設法要留住什麼‧‧‧‧‧‧因此，將「轉屋下」的想念化為文字，盼存在卻不被感知的，悄悄佇足人心某個角落。

《作品賞析》

      爸，包尾你還係轉三義了，你講該係若故鄉，就算三更半夜行山路，都尋得著轉屋个路。你講過，後生時戴在山寮做事，毋堵好摎一個月个薪水五百個銀打毋見忒。你一儕人拿等手電仔尋錢，尋歸暗晡仔，只愁無錢好拿轉去，麼个鬼怪陰火你都毋驚，有麼个好驚？你愛𠊎兜毋使牽掛，三義係你從細戴到大个地方，做得自己歇該片。
      爸，如今比毋得以前，就像你講个，天時變了，現下無共樣了‧‧‧‧‧‧
      記得𠊎兜還細个時節，跈你轉三義看大戲，你從細看到大个客家歌仔戲，總係忠孝節義个故事，無電視个年代，該就係你兜个娛樂。

– – – – – – – – – – – – – – – – – – – – – – – – – – -《閱讀全文》

  第八屆教育部閩客語文學獎客家語散文類教師組 評審感言

  撰稿:何石松

    仰般愛用客語寫文章？從這擺个閩客語文學獎來看，更證明了用客語寫作个重要性。因為，口講係風，筆寫係蹤，這恁多个優秀作品，單淨口傳，可能會跌淨淨，係當打爽个事情。
    𠊎俚做毋得一直停在「客語」个階段，愛慢慢提升到「客文」个高度。因為「言之不文，行之不遠」，斯像這下，毋單淨有「華語」，還有更多个「華文」，所謂「世遠不見其面，看文斯知其心」，文章係萬古千秋个事情。客語文章，除了愛有一般文章个感性真情，運用客語能力熟絡以外，還愛有兜仔文化性，淡淡个歷史情境摎客家个韻味，一種十里飄香个感覺。
    這擺散文獎个作品，都有以上个特性，讀了以後，有一種醹醹个客家味，客家个真情，斯像轉到當時个情境共樣，毋單淨詩中有畫，文中也有畫。
    這擺閩客語文學獎个客語散文組，首先愛恭喜各位得獎者，實在難能可貴；優秀作品非常多，對遺珠之憾个朋友，還請大家能夠「紙角張鹽――愛包鹹(涵)」！

      以下係三位評審共同个感想：

    〈妹仔爺哀心肝惜〉這篇文章結構完整，四平八穩，別有風味，遣詞用字，心暖如春，溫柔敦厚，度大量大，仁者用心。筆法又像高山深壢，山巒起伏，先抑後揚，映襯多姿，所謂「山似論文不喜平」，搖搖曳曳，自有韻味，果然萬山流水，歸向平地，體會逐隻子女都係爺哀个心肝惜，一遍白雲青天。注意部份用字，無幾正確。

    〈遶山〉從生活變化走去遶山，又從遶山體驗發覺人生，表現積極入世，樂觀進取个人生觀。遶山使著公婆生活，越來越甜，遶山使著自家更加能夠欣賞對方个優點，還有盡多知識性个啟發。遶山，毋單淨遶山定定，更有弦外之音，係生活个高度。全文結構完整，文從字順，峰迴路轉，生趣有味，像過一生人共樣，互相痛惜，心念一轉，月到風來。

    轉屋下〉這篇文章，結構嚴謹，像常山之蛇，頭尾相應共樣，頭尾都講著轉屋下，這一語雙關个弦外之音，觸動了千般親情个浪花，散發了生命力摎活力，該係一種生命長河，萬古長存个活力，幽微綿緲，蘊涵了仰般多个思念，面對毋係自家土地个故鄉，千年江山八百主个渺渺人生，一種無奈何又深情無限个心靈弦聲，輕輕个化為柔柔春風，幼秀流轉：明月光華，長留碧空。

    美中不足个係，有部分毋適當詞彙摎用字，還愛用心改正。

– – – – – – – – – – – – – – – – – – – – – – – – – – -《閱讀全文》