第二名 蔡宜勳 《白毛仔船長》

曾經母語相依約，如今只剩貼枕聞。
一個母語的獎，轉增思親悵然。刻燭構思，感謝，內人從容陪伴。

《作品賞析》

      嘿，恁這幾个猴囡仔，莫烏白動我的舵輪仔，任何開關攏袂當磕，是毋是欲等我發性地，共恁踢落海，唉……唉，閣對我反白睚，真正有白目，掠準我咧歕雞胿呢？
      到港仔灣內去問看覓，毋驚恁對雞籠仔山問到龜山島，啥人毋捌我「白毛仔船長」，無定著抑有人會徛直直行禮兼頕頭，欲信莫？今仔日算恁好運搭上我的船，若乖乖，尤其是你，戴野球帽仔的，我就予恁佇船長室歇喘，享受一時仔做船長的派頭，按怎？

      啥貨，欲我講故事！彼哪有啥物問題，你，大頭仔，講……，欲聽啥物款的故事。

– – – – – – – – – – – – – – – – – – – – – – – – – – -《閱讀全文》

  第三名 林秀娟 《柴杙》

      M̄ 驚分 buē 清，只驚 m̄ 願分。
      你所堅持 ê 代誌，無定著 ē 結果 mā 無一定 ē tī 你 ê 眼前發生。M̄-kò，信念就tshan-tshiūnn一欉樹。你無栽一欉，你 ê 心 m̄ 是tsiânn做渡鳥就是水薸。Sóo-tì，tshiánn保持信心 kap 樂觀。信心是壓船石，hōo你搪著大風大浪 m̄ 驚搖。樂觀是心滿意足，hōo你心定目睭金，buē 一日到暗心肝十个五个，抽籤 koh 算命。靜心等待樹願意開花結果 ê 時間。我是有福氣 ê 人，tī 我 ê 年間有法得承接先人 ê 手路色緻 kap 向時濟濟人無法得著得 ê 茄仔色。

《作品賞析》

阮翁 tiàm 市府 ê 周刊讀著德國新住民所刊登 ê「德文學習交流分享會」。
伊問我 kám-ū興趣參加。
我斟酌 tsîn 地點 hām 時間，tìm 頭應好。
Suî 後無偌久，我就接著阮翁按公司寄來 ê 電子批「我已經 kā 你報好名」。
讀著批，喙角 tsiânn 做看著閃閃日鬚，suî 跳出海面 ê 串仔魚 ê 腰身𫝛款。

– – – – – – – – – – – – – – – – – – – – – – – – – – -《閱讀全文》

 

  第八屆教育部閩客語文學獎閩南語散文類社會組 評審感言

  撰稿:何信翰

    這屆的「文學獎」，散文社會組參加比賽的作品總共有37件，是三組內面上濟人投稿的，koh，投稿的稿件品質普遍來講也真袂䆀，會當看出臺語佇校園以外也已經ta̍uh-ta̍uh-á得著文學界的認同。。

    因為優秀的稿件袂少，koh，真濟作品lóng有家己特別凸出的部分，評審也真oh決定名次。最後，經過真濟討論，選出下面3篇前三名的作品：

    第一名是〈暗暝的落雨聲〉，這篇的主題結合地方風土書寫和親情。內容描寫作穡人種粟仔、麻仔、li̋n-jín(紅菜頭)、塗豆的情形。

    散文佇現代社會的用途真闊，所以也有各種無仝文體的散文。總是這是文學獎，所以「文學性」佇評審的標準內面占真大的比例。這篇作品除了共各種農作物種、包、運的過程寫kah真清楚真幼路；koh有著賊偷、做風颱遮的khah緊張、khah刺激的場景，最後結合對阿爸阿母的感情來收尾，內容兼顧知識性和文學性，讀起來真會當帶動讀者的興趣，koh會當得著一寡作穡的知識，所以這篇作品得著評審一致的認同。

    第二名是〈白毛仔船長〉。臺灣是海洋國家，海洋相關的描寫也是真受歡迎的主題。這篇〈白毛仔船長〉用一个雞籠地的船長的氣口落去寫，文章讀起來真順，口語的部份有真濟笑詼，予讀者袂輸ná面對面leh聽hit个船長講話。最後對海洋保護的論述，也予讀者思考人類對海洋的破壞。

    第三名〈柴杙〉，對題目的設定就真特別。Khah少年的讀者，可能連杙仔lóng毋捌看過。若kan-na看題目，會想講這是一篇leh講古早代的作品。想袂到，這是一篇真現代的，koh是講德國新住民的故事。這種khah特別、khah現代的題材，真符合近代臺語文推展的方向 – 用臺語來講現代生活。Koh，文章內容描寫的角色lóng真活，予讀者讀了有心適感。

    歸結來說，題材創新、有文學性，會當感動人，koh讀起來袂khê-khê，就是遮的作品會當得獎的主要原因。

– – – – – – – – – – – – – – – – – – – – – – – – – – -《閱讀全文》