第一名
第一名 許倩雯 《金鳳》
原來人係相逢个時間少，離別个時間多，愛好好珍惜。
金鳳，一個腦膈肚想出來个人物，毋知仰般，緊寫嗄緊試著‧‧‧‧‧‧自家摎佢異熟事个樣仔。筆尖跈等金鳳个生命腳跡行，罕得流目汁个𠊎，幾下擺，忍毋核，停下筆，為著佢掩面噭起來。
虛虛實實，真真假假，牽連主角同𠊎，這就係寫小說餳人个所在。
榮幸得獎，感謝評判先生分𠊎這隻肯定。
《作品賞析》
日頭蹶過細窩仔山，鶴仔岡个街路開始鬧熱起來，雜貨店肚就尖了淰淰个人客。靚膩膩仔个頭家娘，坐在掌櫃桌仔面前無閒算數。一個著等大紅衫，頭那毛電到短短虬虬个後生婦女家，行入雜貨店，鬧熱个雜貨店一下仔恬靜下來。
這儕細妹人看起來異生份，來辦貨个阿菊英偷撂撂仔問頭家娘：「這哪家个人啊？」
雜貨店个頭家娘盡知莊肚个大細事，低聲應講：「阿榮伯姆个心臼啦! 昨晡日正討入來个啊！」
第二名
第二名 徐姿華 《加分人生》
甘願事成，毋甘願萬項難。
感謝教育部閩客語文學獎評審先生个肯定；勞瀝一路里來鼓勵𠊎用大埔客語書寫个登志先生、玉蕉先生，好得有若等鞭策並牽成，𠊎正使得略略抓捉著訣，用吾手寫吾口，同阿姆教𠊎个話語，化做客語文寫出來，未來𠊎共款會看核若等个身影、跈核若等个腳跡，共下為傳承大埔客語打拚；也當勞瀝吾个屋家人，總係分𠊎淰淰个愛同支持，有若等做伴，路較陋扣彎斡也會變做平順好行。
文章肚，佳芬毋向命運犁頭，認真拚出自家个路，尋轉自家做主个幸福人生，在這也勉勵大自家愛堅持客家精神硬程、增志、擔輸贏，相信肯拚總會出頭天，定著使得迎來自家个加分人生。
《作品賞析》
屋側角該頭老茄苳樹打子打去結結結，樹頂掛核一葩一葩像黃泥色細葡萄个茄苳子，餳來兩三隻白頭傑在樹頂絡食，脣項一頭壯旺个山芙蓉，歸樹開淰淰白色帶水紅色个花蕾，磚結个圍牆下一蒲淰黃色个菊花也開來當鬧，在冷冷个寒天日頭下，共樣現出厥等熱情个生命力。
「阿貴嫂，阿貴嫂！」
「欸~~無人在係無？仰脣喊無人應?」阿水自家在該噥哢。
「哦~~係阿水哥，來尞哦！」阿月在屋背洗衫，聽著人喊行緊出來，兩隻手還濕溚溚，嘴緊講話手緊幫褲。
第三名
第三名 林瑞珠 《心結》
揢緪拳頭嫲，你个手肚係空个；伸開手巴掌，你就有全世界。
這擺得著教師組短篇小說个獎，第一愛感謝教育部辦這隻活動，正有機會來參賽；第二愛感謝評審先生个肯定，正有得獎个機會；第三愛感謝屋下人、盡多客家朋友摎𠊎加油，正會擎筆寫出這篇小說。
從細戴客家庄，客語就係𠊎个母語，雖然聽摎講全無問題，但係愛用客語來寫文章，就輒常會卡著。𠊎想做個讀、講、聽、寫全曉得个客家人，正會興起𠊎擎筆寫作个興頭。
人摎人共下，免不了有盡多想法無共樣个所在，毋合意心肚就會有心結，尤其係在較親个朋友摎屋下人身上，特別會堵著。「心結」寫个就係愛情、親情肚，一兜觀念个衝突，無麼个絕對个著摎毋著。雖然講大家乜知：願望係美好个，現實係殘酷个。愛仰般放下自家个想法？人生毋單淨係事業、學問、有錢，身體康健、心愛寬，正係實在个，冠狀病毒在全世界流行時節，希望心結這篇文章做得分大家細思量。
得獎後，試著自家對客語文化个傳承，過後還愛更加打拚、更加學習，繼續寫兜客語文章，盡一份客家人个心意。
《作品賞析》
六月火囪，兼身毋得。
日頭當烈，像火球掛在天頂。天頂伸幾垤細細碎碎个白雲，樹頂个葉仔一動斯無動，一點風斯無。
蝶仔摎蜂仔乜因為佇毋著翕熱，都毋知囥到哪位陰涼个背角去咧。斯伸樹頂蟬仔還在吱吱滾喊無停，地泥下幾隻蟻仔無閒直掣尋等食物。看起來，斯佢兜像毋驚這熱天个火爐哦！
啾紅个鳳凰花開到像餳人个竻泡仔樣，分人口涎水強強會流下來，無閒个六月，一片考畢業考，一片愛準備大學聯考，矺到高中生大氣斯毋敢敨。
評審感言
第八屆教育部閩客語文學獎客家語短篇小說類教師組 評審感言
撰稿:彭瑞金 客譯:江昀
這屆客家語短篇小説獎，係江昀、黃子堯同𠊎三儕委員擔任評審工作。客家語書寫雖然提倡當多年了，毋過用客家語文創作小說牽涉著客語文个書寫能力，還有小説創作个文學創作技巧、能力。這類獎項雖然經過各單位推廣多年，大部分个作品，想愛跈著隨心創作个書寫境界，還有不少煞猛打拚个空間。故所，愛用加倍个力量來推廣，實在有必要性。
這屆評審委員个評選有共識，乜係客語書寫能力同小說創作能力平重，進行評選。這屆客語短篇小說獎總共分學生、教師同社會組三組評選，參加个人數，除忒社會組較豐湧以外，其他兩組參加个人都無已多。
評選个結果：
教師組第一名係〈金鳳〉，這篇小說有當強个社會性，雖然這係一個男女平權个社會，毋過細妹人逐細倈仔个情形，在當多人个心肝肚還係無法度接受，作者抓等這種社會現象來發揮，已有巧思，毋過這乜毋係麼个大到愛剁頭个罪責，包尾變到恁樣个悲劇，下手有兜仔忒重。第二名係〈加分人生〉，乜係一種社會現象个反射，爺哀偏心痛惜个子女，畜大了無定著賢孝，顛倒，從細分爺哀無惜著个細人仔，嗄變做爺哀老年个偎凴。歸篇小說像行雲流水，無半息意外，係優點乜係缺點。第三名係〈心結〉，這篇作品个最大問題係用一拖拉古个文字去形容一粒石頭，小說肚心結係挑事無解，毋係有麼个難解，小說个味緒就恁樣消失忒了，當打爽。可能係教師个人生經驗豐富，故事性十足，普遍較掌握得著小說創作个孔竅。
Scroll to top
