第一名
第一名 杜信龍 《紅包橐仔》
佳哉，咱ê筆閣有寡墨。無墨ê話，咱閣有血有目屎。
這幾冬咱攏真無閒，工課抑是生活攏是。寫作佮文學獎比賽嘛變成咱生活ê一部份，這慣勢已經八冬外。時間制限ê因端，咱設定啥物時愛準備投稿抑是投文學獎，這嘛是這幾年來tām-po̍h-á適應這節奏。講慣勢嘛毋是百分之一百有影按呢做，有時嘛是逼家己拚暝工，甚至是請假khû佇厝內硬thuh，有時嘛是放棄一寡原底欲投ê雜誌抑是文學獎。
總- -是，盡量要求有寫，有投，然後提升質。佇每一擺落筆，評審ê話去分析分拆家己ê想法，閣有這社會ê規則。這幾冬ê成果看來已經成做一个正向ê循環。上要緊ê是，文學手路進步掠外，家己所欲表達- -ê，家己一開始用母語寫作ê初心今閣無變。
母語ê發展比往過攏真好ah，是講母語蔫去ê速度愈閣較緊。這毋是咱一兩人就會使轉變。佇遮向望有志定著愛看向未來，時代咧變真緊，推sak母語ê時，嘛著愛思考按怎佮未來做tsih接。
《作品賞析》
前一暝老爸就吩咐伊這最後一個月就愛分紅包顧柱仔，頂擺票開出來真歹看，這擺絕對袂當閣輸。阿楷請一寡兄弟仔共頂懸送來的錢，逐家分工橐入去紅包，按呢前前後後嘛開欲一禮拜日。
連紲規幾若工走傱佮人盤撋，阿楷兩肢跤行甲撐腿，真袂癮閣再行。看著頭前一欉樹王公，大步行倚，一睏頭仔就坐落來，今仔日的日頭有影會曝死人，佳哉風真秋凊。伊欶一支薰那啉涼- -的，家己共揹仔的紅包提出來算算咧，量其約閣有一里的額猶未分完。這錢甘開，天下間無生理人遐戇的。心肝頭家己咧想這一般人無法度看破的戲齣。是講，這擺袂當閣輸矣，若輸無定會出問題。
第二名
第二名 簡雅惠 《龜蠅欲出嫁》
性命的空喙，我攑筆來紩，用歌聲補滇。
自細漢就愛看古冊愛唱歌，作文也一直是我上有把握的項目，就按呢攑筆拍字kàu-tann。可惜踮臺語這部份干焦會曉講袂曉寫，生活中的沓沓滴滴毋知欲按怎表達，我相信大部份中年人攏佮有我仝款的心聲。
十外冬來，因為身體關係無方便出門，寫文章作曲更加是我上重要的寄託。這幾年慢慢仔學習共想欲講的話用家己的母語寫出來唱出聲，對寢開始逐字查字典到這馬拍字有較扭掠，進步看會著家己嘛誠歡喜。舊年(2021)以〈百年大戲—戲說潭子摘星山莊〉提著臺中文學獎臺語現代詩頭等獎，是我全母語寫作的第一份肯定。這擺，這篇內容透濫親情、大自然佮風俗的〈龜蠅欲出嫁〉小說通受著評審老師第二名的鼓勵，予我對母語寫作更加有信心。
感謝這十幾年來全心照顧的翁婿佮貼心的囝兒，雖然致病了後只會當坐輪椅過日子。懸度拍折；態度猶原。我會繼續挲字變翼股，飛出輪椅束縛的世界，自由自在。
《作品賞析》
「滴滴滴滴—滴滴滴滴—滴滴滴」
艾咪翻身共鬧鐘仔關掉，看徛踮眠床邊換衫的翁婿：「遮早？敢無愛加睏一時仔？」
添富那掛手錶仔那越頭看眠床頂的牽手：「雖然媽佇電話中講伊干焦略仔去熁著爾爾，毋過我猶原袂放心，想欲較早轉去看覓，看你目睭眵眵佮愛睏面愛睏面，無—今仔日我家己轉去就好。」
昨昏下班接著厝仔敲來的電話，阿惜媽講伊無注意去予溫罐的燒氣熁著，厝內抹燙燒的藥膏攏已經抹完矣，問添富隔轉工若有閒才幫伊提一條轉去。閣吩咐伊毋是蓋嚴重，毋免專工走一逝。
第三名
第三名 蔡秀英 《路》
無粒積拍拚的汗水，就無厚汁閣甜的果子。
首先感謝主辦單位佮評審的肯定。
踏入文學的路，一直攏相信，只要堅持寫落去，成功緊早慢會到，絕對袂佇人生中欠席！
這遍會當入選，社會組小說第三名，我已經誠滿意！
雖罔，佇40歲的時陣，決定欲行寫作這條路，20外冬來，幾若擺想過欲放棄。
佇失意的時，會當堅持這濟冬，繼續行寫作這條路，是受著詩人路寒袖老師濟濟的鼓舞，才有氣力行寫作的路。
十外冬前初寫這篇〈路〉的小說，提予吳晟老師看，伊開始教我欲按怎寫小說。經過再三修改，才有這篇小說的產生。
這篇號名〈路〉，毋是亂號的，當初寫好這篇小說，想欲號啥物名，思考誠久，深深感受人生欲行的路，選擇是影響一生的大代誌。就按呢決定號名〈路〉。
這篇〈路〉是我的好朋友的真實故事，共這篇送予文中的男主角。
感謝臺語詩人柯柏榮教我臺文用字。
《作品賞析》
隨香下願
西元2009年 春
人生路總是會拄著真濟的困境，愛不斷磨練家己，予家己變成家己欲ti̍h的款，這寡成長佮褪殼的過程，決定隨人經歷的大細項代誌。
行踏佇規路攏是刺仔的路，欲行出一條予家己袂遺憾的路，伊選擇對致病濟年的牽手毋卸離，甘願陪伴佇牽手的身軀邊共照顧。
評審感言
第八屆教育部閩客語文學獎閩南語短篇小說類社會組 評審感言
撰稿:陳明仁
(04) 紅包橐仔 âng-pau lok-á
這篇作品合著時事中二區選舉議題，描寫過去選舉買票做人柱仔跤ê故事，加添一段娶神主牌仔冥婚ê民間慣勢，有精彩ê劇情結構。
父子兩代為人助選發錢，掀開烏暗ê慘案。
連紅勢力也滲入臺灣選舉ê内容，提高選民警覺，用譀古式小說，寫成冤案解決ê心適代，人kap鬼、貓仔ê互動，真有神祕koh 心適ê處理，得著三位評審ê認同。
(02) 龜蠅欲出嫁 Ku-sîn beh tshut-kè
真好ê小說，借樂暢ê囡仔陪爸母去探阿媽，引出龍眼樹龜蠅病樹ê事，蟲膠曲盤ê歷史也寫甲真斟酌，也有冥婚ê傳說，結局是往生者beh 解救樹欉，真好ê植物樹木智識，故事ê氣氛營造真活動，對話心適，是臺語小說真讚ê作品。若是臺語字詞較斟酌，會閣較好，親像「謝藍」是siānn 籃，𣛮，貯禮ê siānn，籃仔形的，有寡所在較細膩，一定是優秀作家。
(07) 路lōo
這篇小說寫大甲鎮瀾宮媽祖出巡，男主角為著in某淑美失憶症求保庇，家庭後生koh出車禍ê悽慘代。
作者對內心描寫有相當ê功力！無平安家庭ê男主人有真大ê壓力，koh婦人 lâng各樣煩惱，連帶有專業ê好頭路紲無法度承接。
作者有小說書寫ê才情，評審有tām-po̍h建議:
年閣用2009年，免寫西元、公元，常識就知。
juā「偌」是疑問，口語有講guā「外」，文字愛寫juā「偌」，「外」是肯定詞。
有寡文法，「你叫啥物名？」應該是「你叫做啥名？」，「叫」是直接動詞，文法m̄-tio̍h。
評審無嫌，是提醒日後創作愛注意。
Scroll to top
