第二名 黃彥菁 《同學會》

      母語創作是寄語鄉愁最好的方式。
      筆耕多年，近年來致力於母語創作，「同學會」的寫作靈感部分來自於人生經歷，原本是想寫成客語詩，後來嘗試用散文的方式書寫。感謝主辦單位和評審的肯定。

《作品賞析》 

      看等車仔个窗門外背，今晡日朝晨出發時个天時烏陰烏陰，前兩日還緊落雨，這下雖然無雨了，毋過天頂還係一片濛濛，看無麼个清楚，毋過，嗄分人想起頭擺‧‧‧‧‧‧
      還記得該年，𠊎單身一儕人上臺北讀大學，阿爸阿姆係耕種人，在田項當無閒，愛去臺北之前，先摎較大件个行李寄到學校宿舍，一個對南部來个客家細阿妹仔，在開學前兩日，自家擐等包袱坐客運來到這個毋熟識个所在，一開始當無慣，時常想轉屋下去，慢慢仔正定貼下來。

– – – – – – – – – – – – – – – – – – – – – – – – – – -《閱讀全文》

  第三名 王倩慧 《揚蝶仔飛來搞》

文學个風景恁靚恁多變化，ngaiˇ愛記錄下來。
節錄《臺灣自然寫作選》：「自然寫作是一種強調感官與心靈體驗，結合自然科學、自然史、文化史、倫理學的知性書寫。」
我嘗試用母語（客語）書寫自然散文，因為文學創作沒有語言的限制，華語可以寫的，客語也可以書寫。

《作品賞析》

      𠊎識在長青學苑做美術助教，該兜學習畫圖个學生仔都係熱愛生命个老人家。有一個叔姆安到「揚蝶仔」，佢在上課个時節，輒常喊𠊎坐在厥身脣教佢畫圖。𠊎胚想，定著係佢想愛摎人講心事，又當敗勢摎同學講話，故所佢希望𠊎做得教佢畫圖，又做得聽佢講話，畫圖个事情就無恁重要咧。
      佢講：「𠊎摎老公識『秤不離鉈，公不離婆』，因爭老公正過身，就發病有憂鬱症。想愛多認識朋友，行出憂傷个情緒，故所來學畫圖，其實心肝肚盡孤栖，想愛在伸个人生裡肚，留下盡靚个紀錄。」
      作家孟東籬在《愛生哲學》裡肚，佢寫著：「『愛生哲學』个另一種態度係對自家生命个珍惜，對他人－－甚至其他動物植物－－生命个珍惜，對生活、對心靈个領會」。

– – – – – – – – – – – – – – – – – – – – – – – – – – -《閱讀全文》

  第八屆教育部閩客語文學獎客家語散文類學生組 評審感言

  撰稿:何石松

    仰般愛用客語寫文章？從這擺个閩客語文學獎來看，更證明了用客語寫作个重要性。因為，口講係風，筆寫係蹤，這恁多个優秀作品，單淨口傳，可能會跌淨淨，係當打爽个事情。
𠊎俚做毋得一直停在「客語」个階段，愛慢慢提升到「客文」个高度。因為「言之不文，行之不遠」，斯像這下，毋單淨有「華語」，還有更多个「華文」，所謂「世遠不見其面，看文斯知其心」，文章係萬古千秋个事情。客語文章，除了愛有一般文章个感性真情，運用客語能力熟絡以外，還愛有兜仔文化性，淡淡个歷史情境摎客家个韻味，一種十里飄香个感覺。
這擺散文獎个作品，都有以上个特性，讀了以後，有一種醹醹个客家味，客家个真情，斯像轉到當時个情境共樣，毋單淨詩中有畫，文中也有畫。
這擺閩客語文學獎个客語散文組，首先愛恭喜各位得獎者，實在難能可貴；優秀作品非常多，對遺珠之憾个朋友，還請大家能夠「紙角張鹽――愛包鹹(涵)」！
      以下係三位評審共同个感想：
    〈時來鐵成金〉這篇文章客語運用非常熟絡，諺語運用適當，活潑有感情，斯像人看著該編竹籮，打稈索个情景，破篾仔，破竹析个聲音，阿爸个音容笑貌，還像停留在竹林之間，久久毋會消失，正經係文中有畫。毋單淨寫出社會變遷，又散發親情个韻味，還對手藝个調整運用，阿爸个堅持，老弟个傳承，手藝果然行出新天地，柳暗花明，時來運轉，一片春光，點鐵成金。
    〈同學會〉這篇文章客語運用還已做得，全文氣氛嚴肅像有大事發生樣，果然明 明係告別式，能夠另出新意，講係同學會，可謂用情已深，有一種「祭，如在」个感覺，斯像見著人影開同學會共樣，相互之間个來往，一種至情無情，無奈何个心情，毋知係開同學會，抑係告別式，哀傷之中相見，分人痛腸艱苦。 注意華語詞彙。
    〈揚蝶仔飛來搞〉題目安到已好，活潑有味，有創意，加上客語運用還已做得，全文係一種淰淰个真情，寫一個老公過身个「揚蝶仔」，從失落，傷心，到尋轉自家生命意義，過好自家生活个藝術治療，改變了人生，有一種化蝶个思想高度，結構完整。注意全部愛用文字寫出，平常字毋好用音標替換，摎客語無關个毋使注解，詞彙愛有客家味。

– – – – – – – – – – – – – – – – – – – – – – – – – – -《閱讀全文》