第二名 蔡振文 《親愛的，後來的飛攏葬佇遐》

      願詩作所有的精采永遠不及生活。
      首先，我愛感謝評審老師予我這个機會，這是我第二擺投稿臺語詩，這篇予評審老師照顧著，我感覺誠好運。
      我毋是一个𠢕講故事的人，但是文字創作是我的興趣，所以就一直往詩的方向行落去。寫詩誠好耍，只要 mài 破壞詩中的氛圍奇奇怪怪的文句攏會使予接受，毋管是形式抑是內容，攏有足濟生份化的空間。
      這首「親愛的，後來的飛攏葬佇遐矣」我寫了誠久，一來是我臺語毋是講足好的，所以有誠濟所在攏是 ná 佇和序大開講，ná 討論語詞用法的文章。著獎名單佇網路公佈的時陣，我佮我爸爸媽媽分享，結果顛倒是𪜶看無矣，想起來嘛是誠心適。
      閣來，我欲感謝阮鳳丁老師，感謝老師揣時間佇投稿前進 tsham 我討論這首詩的問題，雖然有足濟猶閣無夠臺語氣的所在，但是我猶是用我家己感覺上有我語言模式的版本投出去。
      用臺語寫作誠開時間，足濟詞我攏是 ná 寫 ná 揣臺語辭典內的正字，雖然落尾因為家己定定袂記閣改轉羅馬字，但是這个過程我是真正學著足多無看過的語詞。
      愛按怎予臺語繼續活落去，毋是簡單的議題，講予文雅、佇生活中自然的使用攏是這馬愛拍拚的方向，希望多元共存的社會，到足久以後的社會，袂存 tshoh 姦撟時才會想著臺語。

《作品賞析》

後來所有的飛攏已經
葬佇咱的語言內底
有時城市反身的時陣
落葉的皺痕發酵做舊厝
阮細喙啉酒時
目睭senn-koo以後

– – – – – – – – – – – – – – – – – – – – – – – – – – -《閱讀全文》

  第三名 蔡亞涵 《捌代誌》

      「真正的生活總是在他方。」——韓波（Arthur Rimbaud）
    第一擺投稿，自本並無偌期待會使提獎，實在真多謝評審老師的肯定。我一直無自信會當寫好故鄉的風景，但是猶原想欲試看莫，用詩來表現這雙目睭自細漢所看見的彼个海墘仔。1994年有一條路寒袖作詞的歌號做《畫眉》，阿母真佮意，我兩三歲的時就會曉綴咧唱囉。這條歌描寫山佮雲互相陪伴、珍惜的互動關係，共𪜶比做是恩愛情人。毋過對我來講，基隆的雲恐驚無可能是這款的溫柔愛人，所以我想著會使來為伊寫一首詩，佇大漢、離鄉了後，來為這陪伴我成長的風景，寫一个歹性地的、無完美的愛情故事。

《作品賞析》

故鄉的黃昏無媠
雲定定是罩著日
烏陰烏陰
無親像別位的雲
將家己染滿色水
雞籠的雲伊無欲管待

– – – – – – – – – – – – – – – – – – – – – – – – – – -《閱讀全文》

 

  第八屆教育部閩客語文學獎閩南語現代詩類學生組 評審感言

  撰稿:方耀乾

    第八屆(110年度)教育部閩客語文學獎——閩南語現代詩由向陽、路寒袖、方耀乾三位擔任初審和決審的評審委員，時間是111年3月初2，地點佇國立臺中教育大學臺語系會議室。

    這擺閩南語現代詩學生組總共有26件參賽，比頂屆(108年)閩客語文學獎學生組有42件參賽減16件，這是一个「訊號」，是按怎會減遮爾濟？這值得思考。

    這屆的文學獎的評分標準項目主要囥踮：一、母語使用能力；二、結構佮修辭；三、內容豐富性；四、內容流暢度；五、內容創意性等。語言使用能力是任何文學創作上基本的要求。語言使用能力若無夠好，就無法度寫出有文學性的作品。因為咱母語的推動才起步無久，母語的教育猶未全面性、深化。所以咱需要特別強調。這屆學生組參賽的詩作普遍來講，臺語的語法佮語詞平均的算普通，無蓋端的，其中有幾偌首詩的華語化猶真嚴重。這有可能是先用華語寫抑是思考，才閣翻譯做臺語。嘛有可能原本參賽者的臺語猶未蓋熟手。當然我向望毋是按呢。這表示母語的推動佮教育對語文的書寫猶需要進一步深化。就文學來講，作品的結構佮語言修辭、內容的豐富性、內容的流暢度、內容的創意才是文學作品特別愛講究的所在。也是咱愛學習、致意的所在。

    學生組作品的主題集中佇愛情、親情、生態、環保書寫，闊度和多元性猶無夠，對社會事件、族群議題的書寫較欠。毋過這對學生來講，嘛毋免傷要求。這屆得獎的前三名有寫愛情、抒情、性命的哲思，是清新的小詩，毋是前幾冬定定著獎的類型，過去差不多攏是沉重的大敘述書寫，這屆算是寶貴的收穫。

    這屆的前3名如下：第一名是〈十七歲的暗戀〉。文字真清氣，感情真閣純，敘述的結構平穩妥當，是真好的作品。「偷偷矣」應該訂正做「偷偷仔」。第二名〈親愛的，後來的飛攏葬佇遐〉有真幼路的哲思和感嘆，敘述的推展非常有層次條理，是難得的作品。第三名〈捌代誌〉是思鄉的作品，也是成長文學。文字成熟，情感的推展誠懇、牽挽也四序。

2022.03.17，臺中教育大學求真樓

– – – – – – – – – – – – – – – – – – – – – – – – – – -《閱讀全文》