第一名
第一名 李夢花 《臺灣番薯長山水》
番薯毋驚入土綿，時到递藤一年又一年。
其實寫種族議題个故事，𠊎心肝肚有兜驚驚險險，愛仰般寫正毋會搐著讀者心肝頭个傷口。故事在人寫、感受在人心，想去想轉，還係對自家熟事个親戚、鄰舍寫起。
臺灣番薯多種多色，經過多元文化个灌溉，這方所在个番薯正會又甜又鬆。這篇小說裡肚个人物、經歷故事，有時代个無奈，有生活个感嘆，也有情摎義个兩難。番薯雖然經過水涿日炙，佢還係愛煞猛綻筍递藤；佢認命、耐天旱个特性，係永久毋會改變个。
承蒙評審委員个肯定，這份鼓勵打開𠊎往後創作个路，係一條加盡闊盡遠个路，文學个包容力撐起𠊎个肩頭，𠊎講、𠊎看、𠊎寫，繼續行客語寫作个路。
《作品賞析》
六月天公，當晝日頭烈、烈、烈，晒到阿水伯菜攤仔擺等个青菜，逐皮菜葉仔斯憔憔餒餒，阿水伯熟絡收起青菜，攤仔蒙好塑膠布。屋下，阿玉姨早就煮便等佢轉來食晝。阿水伯姓陳安到漢水，跈等國民政府來到臺灣，係長山來个山東人，莊肚个老人家私下喊佢長山水無就陳水。當年國民政府規定，講長山來个兵仔還愛反攻大陸，做毋得在臺灣討餔娘訂根递藤。一直到佢四、五十歲該下，政策改變，經過媒人紹介，正討老公死忒幾下年个阿玉姨。
老公過身該年，阿玉姨後生遙遙正二十出頭歲，佢渡等正嬰兒仔恁大个倈仔賢銘，還有一個老家娘蘭香伯婆愛服侍，屋下無山也無田，一個婦人家，乜無才調去賺錢，斯做得去拈人割禾伸个禾串仔、還過番薯改忒後無愛个番薯腳，佢牙根齧等，刻耐仔過了幾年清苦个日仔。
第三名
第三名 左春香 《阿義打鬥四》
「光中去，暗中來！」默默付出的，掌聲必響自心底。
蓋歡喜𠊎這篇〈阿義打鬥四〉小說得著評審先進个肯定，第一愛感謝你兜！
蓋欣賞𠊎國小同學群，閒時問安講早，無閒時弛崗打陣滿天下走，大大細細項事情每擺都分享，分𠊎鼻著𠊎佳冬故鄉个人情同花香，滿足𠊎心肝肚想愛做「返青」毋得著个妄想。
蓋感謝吾姆阿蘭妹，盡早就分𠊎有「客家意識」，在𠊎還盡細時節就交代講「愛嫁客人」，講吾外阿公、外阿婆講个「上杭」話乜係客話，雖然𠊎聽毋識；感謝吾家官阿隆哥，堅持細人仔愛會講海陸客，做毋得攉忒祖先話，乜分𠊎有機會學習北四縣摎海陸客。
客話寫來蓋靚，恬恬仔靚，像深山大海，看毋盡舀毋燥，客話書寫个文藝值得定定仔雕、慢慢仔炆，希望自家過再寫過再練，分過多人共下來行這條靚靚个客語文學路！
《作品賞析》
「該麼人帶來个啊？仰恁呢紅漬漬甜滋滋，像會唶人心肝樣仔！」
「你無看新聞咩？抑係詐毋知啊？這盤就係紅龍果，係阿義這枋又打頭名个種作呢！伊蓋會種喔！」
大家嘰嘰嘎嘎，有人問，有人答，鬧熱煎煎呷無停。這擺參加六丙同學會个這兜，有阿二妹、仙人、文牯、班長、阿爸、阿珍、瘦狗等等曩二十儕，在「阿蘭田螺」店肚，一品一品个菜緊出緊食，臨尾就這盤紅龍果出桌。原來阿義臨暗該下既經有先送這最萋个正摘啊著个紅龍果過來店項，講愛分這兜好豺嘴 先嘗一下。
第三名
第三名 王倩慧 《一頭茉莉牽等三隻心》
一日寫一句，𠊎做欸到。
小說，不僅有虛構，還要有關心社會的胸懷；我將現代社會環境紀錄下來，以小說型式呈現。多年以後，再回頭，可以為下下一代說著我們曾經看到過的故事。
《作品賞析》
許台生摎餔娘黃娜娜對印尼轉來，戴桃園新屋區新民村。
黃娜娜係印尼客家人，印尼个屋下有種一頭茉莉，故所黃娜娜當好鼻茉莉个香味，該香味囥在厥心肝肚，乜係頭那裡肚个長期記憶。係講，黃娜娜在臺灣生活無恁艱苦，生活習慣大體摎印尼共樣；還有厥老公摎佢種一頭茉莉，分佢輒常做得鼻著家鄉个味緒。
一𥍉目，過忒四十零年，許黃娜娜既經做阿婆了，大家人喊佢許伯姆；佢盡惜自家開山打林个田地，乜盡愛摎新民村个隔壁鄰舍共下打嘴鼓、共下做客家菜、還會做米篩目、粢粑仔；佢當會煮客家料理摎外省點心，因爭厥老公係外省人；許伯姆斯融入客家族群摎新住民个客家莊。
評審感言
第八屆教育部閩客語文學獎客家語短篇小說類學生組 評審感言
撰稿:彭瑞金 客譯:江昀
這屆客家語短篇小説獎，係江昀、黃子堯同𠊎三儕委員擔任評審工作。客家語書寫雖然提倡當多年了，毋過用客家語文創作小說牽涉著客語文个書寫能力，還有小説創作个文學創作技巧、能力。這類獎項雖然經過各單位推廣多年，大部分个作品，想愛跈著隨心創作个書寫境界，還有不少煞猛打拚个空間。故所，愛用加倍个力量來推廣，實在有必要性。
這屆評審委員个評選有共識，乜係客語書寫能力同小說創作能力平重，進行評選。這屆客語短篇小說獎總共分學生、教師同社會組三組評選，參加个人數，除忒社會組較豐湧以外，其他兩組參加个人都無已多。
評選个結果：
學生組係〈臺灣番薯長山水〉得著第一名，這係一篇有歷史深度个小說，故事彎彎斡斡，情節描寫到當餳人，客語書寫熟練。共下得著第三名个有〈阿義打鬥四〉同〈一頭苿莉牽等三隻心〉，頭前該篇借「六丙同學㑹」，流水帳式个描寫分開多年後个老同學各儕个人生故事，同學之間無麼个互動，欠缺小說成為小說个結構。後背該篇用新民村發生个大細事情堆疊成篇，雖然有一個日久他鄉變故鄉个新住民做故事主角，毋過無麼个互動連結，客語書寫還有當大个煞猛空間。第二名從缺个原因係兩篇作品都欠缺罅擺个小說元素。
Scroll to top
