第二名 林奕廷 《心‧佇羅東站落車 sim. tī Lô-tong-tsām lo̍h-tshia》

      相信家己，永遠堅持，毋通放棄！毋好辜負自家。

      這遍參賽，自從作品交出去了後，就無閣huá-lòo(follow)相關消息。一直到收著面友kah老師ê訊息，才知影家己有著獎。

      這篇小說號做《心。Tī羅東站落車》，透過愛情故事來描寫宜蘭tī自然、人文等各方面ê特色。故事ê時間背景貫穿過去、這馬、未來，用這款方式，懷念過去、呈現這馬，以及寫出我對宜蘭、對臺灣未來ê寄望。用羅馬字來表現宜蘭在地特殊ê腔口。

      這斗會當著獎，心內感覺tsiânn意外，mā tsiânn歡喜，這mā是頭一擺有hiah tsē人kā我o-ló。另外，除了著等，閣提著獎金，總算會當sió-kuá-á減輕厝內ê負擔。
      感謝kuí-ā年來，kā我栽培、牽教、疼痛ê每一个臺語老師！這幾冬來，有恁ê鼓勵kah指導，我ê臺語才會tī短時間內進步，mā才有機會寫出這篇作品。猶閣有ài感謝這回比賽ê評審，對我ê文章有肯定，hōo我會當成功著獎。
      我會繼續加油，進行母語ê創作。最後，ài恭喜其他著獎選手，母語路上，咱做伙拍拚。恭喜其他著獎ke選手，ên共下為母語煞猛打拚。

《作品賞析》

      2050年，後生至楷、查某囝卉青攏考著臺中的大學。歇熱的時，tshuā in坐火車落去臺中tshit-thô，熟似彼爿的環境。
      下晡倚兩點，佇羅東車頭等車，月台頂來來去去的人影、四種語言的放送、作穡無地歇喘的站務人員，以及眼前的風景，予我想起30年前，佮翁婿熟似時的情境。唯一無仝的是，彼當陣鐵枝路猶佇地面，這陣已經高架化矣。
      看著四箍圍仔有人相攬、手牽手咧談戀愛，當咧戀愛時期的至楷muī我講：「阿母，你佮阿爸是按怎熟似的？」卉青tuè咧muī：「你是按怎會佮阿爸做伙？」這兩个囡仔kā我mūi kah無喘氣的空間，我看若是無予in答案，in絕對袂甘願。濟濟囡仔細漢的時就會去探聽爸母的愛情故事，這兩个囡仔煞咧欲讀大學才頭一擺muī我這个問題。

– – – – – – – – – – – – – – – – – – – – – – – – – – -《閱讀全文》

  第八屆教育部閩客語文學獎閩南語短篇小說類學生組 評審感言

  撰稿:宋澤萊

    本屆閩南語小說類學生組的作品參加比賽的作品攏總有7篇，但是因為目前真濟青年學生受到網路 bàng-gah佮短劇的影響傷深，所以寫出來的小說比較譀古，甚至有違反人性的小說出現，所以這屆只會當評選出兩篇得獎的作品。

    第一名的作品是〈徛山沬水〉，是一篇靠海為生的女性一生的故事。
    這位女性生佇海邊，大漢了後也嫁佇海邊，老爸佮翁婿攏是出海掠魚的人。
    伊平日的工課就是到海邊去抾紫菜、海螺、九孔、海膽，賣予販仔來幫助散赤的家庭經濟，伊的人生差不多攏做這項艱苦的工作，尤其是佇大寒的冬天入海水裡去抾紫菜，予伊的手受傷變形。
    故事對 【tuì 】伊結婚後寫起，紲落去是寫伊有身的艱苦，後來伊總共生四女一男，因為散赤，有一位查某囡仔煞不得已分予別人。四個囡仔大漢了後離開爸母去外地，也離開海邊，攏真不孝，真少轉來看伊。到年老，厝裡只賰伊佮翁婿兩人，兩人感情也無好，逐日相罵。了後翁婿死去，最後伊也因為破病予人送入去病院，佇插管中死去，艱苦的人生總算結束。
    這篇小說差不多攏寫人生的烏暗面，無一絲仔快樂，是典型的悲劇小說，人物未免傷過頭扁型。
    雖然是按呢，它卻是一篇十足寫實的小說。作者針對海邊揀抾紫菜的勞動寫kah真詳細，親像kā 讀者帶到工作的現場，予人大開眼界，替寫實派的小說做出真了不起的貢獻，這是這篇小說得獎的最重要原因！
    文字雖然受著一寡北京語的影響，但是基本上幼路活骨，真正爾好讀。
    情節順利合理。
    伊得獎是應該的。
    第二名的是〈心。佇羅東車站落車〉。
    這是一篇對【tuì 】未來2050年倒轉來看現此時2022年的一場美好戀愛的小說。到了2050年，伊佮彼位2022年愛伊的查埔人已經結婚，所生的囡仔也已經考著大學，家庭相當美滿。所以伊對現此時2022年這場的戀愛是滿意的。所以，這是一篇充滿田園、喜劇氣氛的小說。
    小說用未來的視角倒轉來看現此時的寫法，真有創造性，也真趣味，這是這篇小說得獎的最大原因。
    文字的使用正確，真活骨。
    場景的描寫出色，甚至寫出台中到羅東火車上的廣播聲音，予人真有現場感。
    情節安排合情合理，也真合人性。
    伊得獎是應該的。

– – – – – – – – – – – – – – – – – – – – – – – – – – -《閱讀全文》