第三名 吳餘鎬 《模範母親》

      做人實在，真心待人。
      當《臺灣客家李文古話本》係𠊎第一本用客話寫个書，記得序文項𠊎講過：「正開始寫時，有一滴仔生疏‧‧‧‧‧‧」，毋過，跈等《大陸原鄉李文古話本》、《掌牛刻仔》、《天上人間──霄裡》、《阿肇牯》‧‧‧‧‧‧恁多本，五六十萬隻字純客話个書續等出來，到這下來，𠊎嗄毋慣用「國語」來寫文章囉！
      一個好朋友識問過𠊎：「客語、華語在感情的表達力度上，哪種比較真確？」𠊎應佢：「寫過這麼多文字以後，我發現：如果就表達意思而言，華語是我最省力的一種選擇。但在情感的表現上，客語還是我最真誠的流露。」‧‧‧‧‧‧佢聽吔頷等頭那講：「客語文章在我們一樣的背景下，是流著淚在讀，‧‧‧‧‧‧是一個世代的愁情！別人無法理解！」──𠊎共樣乜有恁樣个感覺。
      識看過羅肇錦教授在「何謂客家文學？」一篇文章肚項講著：「整個文學產生的原動力是心靈深處自發自動的情感和思維所引發的，是別人無法取代的，是獨特的，也是唯一的自我表現。‧‧‧‧‧‧一個客家人，用客家話寫作（當然也是客家話思維），所寫的內涵，整個著眼在客家社會文化感情有關，那麼他的作品就是道地的『客家文學』了。‧‧‧‧‧‧」恁多年來，𠊎有心客家文學寫作，這篇〈模範母親〉毋知見得人無？

《作品賞析》

      鄉肚母親節个表揚大會，臺頂司儀擎等麥牯大聲个喊等：
      「各位叔公阿伯叔婆伯姆，這下請俚个模範母親劉茶妹伯姆上臺。‧‧‧‧‧‧」
      阿茶姊企在臺下，議員倈仔陪等，眾人攙等定定仔徙等步仔扶上臺頂。
      「唉──」
      佢長長个敨著一口大氣。
      看等臺下一大群人，煞猛个打等拍仔。佢問倈仔：
     「𠊎敢係發夢？‧‧‧‧‧‧」

– – – – – – – – – – – – – – – – – – – – – – – – – – -《閱讀全文》

  第八屆教育部閩客語文學獎客家語短篇小說類社會組 評審感言

  撰稿:彭瑞金     客譯:江昀

    這屆客家語短篇小説獎，係江昀、黃子堯同𠊎三儕委員擔任評審工作。客家語書寫雖然提倡當多年了，毋過用客家語文創作小說牽涉著客語文个書寫能力，還有小説創作个文學創作技巧、能力。這類獎項雖然經過各單位推廣多年，大部分个作品，想愛跈著隨心創作个書寫境界，還有不少煞猛打拚个空間。故所，愛用加倍个力量來推廣，實在有必要性。
    這屆評審委員个評選有共識，乜係客語書寫能力同小說創作能力平重，進行評選。這屆客語短篇小說獎總共分學生、教師同社會組三組評選，參加个人數，除忒社會組較豐湧以外，其他兩組參加个人都無已多。
    評選个結果：
    社會組个參選作品較多元，評選个考量乜較複雜，客語書寫同小說个文學元素都愛兼顧，寫來兩面光个作品無多。包尾選出个第一名係〈拆股〉，描寫鬥股个生理難做，就算信神信佛，盡重要个還係自信，主題明確，故事寫來淨俐流掠。第二名係〈天年〉，寫客原通婚，雖然係講老古董个故事，嗄係社會演進个一項記號，缺點在主題多元分散。第三名係〈模範母親〉，這篇作品个故事係作者編出來个，雖然編出誚㸐个味緒，毋過無分讀者想像个空間，就無讀小說个趣味哩。

– – – – – – – – – – – – – – – – – – – – – – – – – – -《閱讀全文》