第二名 鄭如絜 《西本願寺的風聲》

墊實母語的種子
對家己心穎起致
感謝主辦單位的鼓勵，予阮有榮幸參與一份貼心的肯定，佇學習母語的過程當中，毋但共欲斷橛的母語抾轉來，嘛揣著序大過去疼惜的溫暖佮感動。
一字一句所含帶的意義，盡家己小小的力頭，予伊會當開枝湠葉，代代相傳。

《作品賞析》

輪番所的thâ-thá-mih
藏有拗鬱喉滇的心事
泡一鈷透濫俗事的清茶
對甌仔底，掀開
彼層重重疊疊的日子

– – – – – – – – – – – – – – – – – – – – – – – – – – -《閱讀全文》

  第三名 翁月鳳 《王徵吉——掛號》

感恩的心，是力量的泉源
烏面抐桮對遠遠的所在
向我飛來
in白白的翼
親像是欲送予我的紙
in烏烏長長的喙
親像是欲攑予我的筆
我輕輕共筆搦咧
佇紙寫落：感謝

《作品賞析》

風經過的路線
一粒種子用憤怒咧飛
落佇偷魚賊仔的身軀頂開一蕊䆀花
血sai-sai像捙倒漆，彼搭
搜著半張風脈的地圖
搜著雨針畫過的痕跡佮雲的棉紗

– – – – – – – – – – – – – – – – – – – – – – – – – – -《閱讀全文》

  第八屆教育部閩客語文學獎閩南語現代詩類社會組 評審感言

  撰稿:路寒袖

    這屆社會組收著六十三件的參賽作品，三位評審第一輪投票了，有十三篇得著票數，無三票的，得兩票的干焦兩篇，其他十一篇攏是一票，雖然是按呢，不而過這嘛表示仁仁仁的作品誠濟，才會有五分之一以上予評審看佮意。
    另外，逐家猶閣是愛揀歷史事件、災變佮受難的人物來寫，大概認為這款題材較有重量，好親像自然就會加分，譬如寫陳澄波、小林村就各有兩篇，猶有寫臺灣新文學之父賴和、農民組合的簡吉、白色恐怖的受難者黃溫恭、烏面抐桮的守護者王徵吉……，特別是賴和、陳澄波會使講無論閩南語、華語的大大細細文學獎總是有人提𪜶做題材，我的意思毋是袂使寫𪜶，顛倒誠鼓勵，重要是愛有作者家己的感受佮觀點，毋是共伊的故事用詩的形式講一遍爾爾。
    第一名的〈斯卡羅戰歌〉寫的歷史事件是最近誠流行的公視連續劇，作者有用心做功課，是一首故事豐富、氣勢飽滇的史詩，「斯卡羅的血脈是用袂完的火炮／竹箭是驚天動地的機關銃」為本詩定調，「早起的雺霧是海洋咧悲傷吐大氣／欲暗仔的紅霞是天星墜落的血水」，這款詩句展現出作者的藝術性。
    第二名〈西本願寺的風聲〉仝款是取材歷史，佇空間的描寫中，暗喻曾經發生佇遐的白色恐怖事件，作者用旁觀者無喝咻毋過不止仔沉重的冷筆，𤆬領讀者行入去時間的磅空。
    第三名是〈王徵吉─掛號〉，烏面抐桮嘛是熱門的題材，但是一般的主角攏是鳥仔，這首詩誠特別，主角是人，就是人稱『黑琵先生』（華語，Mr. Happy的意思）的王徵吉。規首詩結構完整，人物的形象刻劃立體，不而過主標「王徵吉」佮副標「掛號」對調，按呢會較像詩的標題。

– – – – – – – – – – – – – – – – – – – – – – – – – – -《閱讀全文》