閩南語 散文類

【教師組】

   第一名 蔡婕馨 《傳承的滋味》

      性命的長度歹按算，把握會牢的是闊度。
      寫作是一條自我認同走揣家己的過程。感謝評審委員對我寫作內容的肯定，予我第一名的鼓勵。我內心濟濟的感動，實在毋是三兩句話就有法度表達。總是感謝閣再感謝。
      104年通過認證才開始用閩南語寫一切，寫我的過去和未來的向望；寫生活中的體會，記錄心情的鹹、酸、苦、澀、甜。人生是一條無法度回頭的單行道，往過的美好抑是心酸，若無用方法記錄落來，別人是感受袂著。聽入耳的語言用伊的文字記錄才會入心。寫這篇傳承的滋味是感念阮阿公、阿媽拚勢擔輸贏的人生態度對我的影響。作穡人是有種有走逝，我是有寫會成句、句會成篇。
      事無做袂成，路無行袂到，人的一生親像一本冊，雖然無法度決定厚抑是薄，精彩的程度卻是搦佇家己的手裡，結局怎樣安排介在各人，人若有拍算毋驚命來磨，認真勇敢才有通行出那來那闊的人生路。

《作品賞析》

       進財是一个九歲就無老爸的囡仔，閣較無奈何（bô-ta-uâ）的是伊的娘嬭是一个縛跤的查某人，就算講過往的翁婿有放一片田園予伊，伊敢有才調做啥物粗重的穡頭？若準代誌發生佇現此時，檢采嘛是愛枵饑失頓辛苦過日，何況是佇一百冬前彼个艱苦閣欠缺的年代。一个失去翁婿的查某人欲靠家己晟養三个囡仔，彼就親像是厝漏閣拄著半暝雨，無打緊，無米兼閏月，日子是欲按怎過？
      佳哉，天無絕人之路，翁婿的姑表阿兄猶未娶，毋甘看𪜶一家大細，為著基本生活的三頓飽咧沐沐泅，無顧眾人的反對佮款勸，甘願做人的便老爸替別人照顧某囝。命運創治烏雲罩頂的日子總算是過去矣，毋過雲開日出的彼一工，猶有一段離天七舖外路遠遠遠的路愛行；苦苦苦的目屎愛攪泔糜仔吞。


– – – – – – – – – – – – – – – – – – – – – – – – – – -《閱讀全文》