第二名 吳餘鎬 《夢》

      做人實在，真心待人。

      當《臺灣客家李文古話本》係𠊎第一本用客話寫个書，記得序文項𠊎講過：「正開始寫時，有一滴仔生疏‧‧‧‧‧‧」，毋過，跈等《大陸原鄉李文古話本》、《掌牛刻仔》、《天上人間──霄裡》、《阿肇牯》‧‧‧‧‧‧恁多本，五六十萬隻字純客話个書續等出來，到這下來，𠊎嗄毋慣用「國語」來寫文章囉！

      一個好朋友識問過𠊎：「客語、華語在感情的表達力度上，哪種比較真確？」𠊎應佢：「寫過這麼多文字以後，我發現：如果就表達意思而言，華語是我最省力的一種選擇。但在情感的表現上，客語還是我最真誠的流露。」‧‧‧‧‧‧佢聽吔頷等頭那講：「客語文章在我們一樣的背景下，是流著淚在讀，‧‧‧‧‧‧是一個世代的愁情！別人無法理解！」──𠊎共樣乜有恁樣个感覺。
      識看過羅肇錦教授在「何謂客家文學？」一篇文章肚項講著：「整個文學產生的原動力是心靈深處自發自動的情感和思維所引發的，是別人無法取代的，是獨特的，也是唯一的自我表現。‧‧‧‧‧‧一個客家人，用客家話寫作（當然也是客家話思維），所寫的內涵，整個著眼在客家社會文化感情有關，那麼他的作品就是道地的『客家文學』了。‧‧‧‧‧‧」恁多年來，𠊎有心客家文學寫作，這篇〈夢〉毋知見得人無？

《作品賞析》

      老屋係厥太傳下來分佢兜个老屋。──裡背戴等厥公三房人。子孫不孝，大伯公傳到孫仔，屋下出隻賊仔，一日到暗㘔飽閒閒，亍上亍下个挶毋做事。無錢好使吔，佢敢上家下屋个搣射人。等到世大人過身吔，無人管酌，分著个屋地，一下仔就分佢賣到淨淨，又過恐喝屋下个姊妹，摎佢兜分著个額，通棚賣忒；二伯公个子孫無旺，三代單傳到孫仔又也無增志 。──讀書毋識又毋煞猛── 拈燒怕冷个搵在屋下食強力膠。歸日仔昏昏癲癲，屋下無好食吔，分人三五萬銀騙啊去，所有權狀捧等去分人過戶。分著厥額个屋地，兩下半就分佢覂覂忒去分人‧‧‧‧‧‧。

– – – – – – – – – – – – – – – – – – – – – – – – – – -《閱讀全文》

  第三名 彭瑞珠 《在該搭山仔裡肚》

      讀書，係為著愛曉得享受生活。
      吾公賣忒个山仔，𠊎同佢記錄起來，連同吾太、吾婆个身影，還過，該片山林肚識有過个日頭、花樹、清風……，化做文字，留在教育部个語文成果網。

《作品賞析》

      「鄉公所後背，該山仔！阿公个老屋，就在該！總係……，老屋乜毋知還在無？」
      見擺駛車仔在高速公路，會經過右手片个造橋鄉公所个時節，𠊎總會想起、總會忍毋核，想同細人仔講:「在該搭山仔裡肚，識有過一間異雅个伙房屋；在該跡位个山仔裡肚，識有過你兜个阿太、阿太太个腳跡。」
      「係阿公，起个老屋哦？」
      「麼人起个？𠊎乜毋知。盡少，在你兜毋識看過个阿太太還在个時節，就有咧。毋過，阿太過身前，同山仔賣忒……。 」

– – – – – – – – – – – – – – – – – – – – – – – – – – -《閱讀全文》

  第八屆教育部閩客語文學獎客家語散文類社會組 評審感言

  撰稿:何石松

    仰般愛用客語寫文章？從這擺个閩客語文學獎來看，更證明了用客語寫作个重要性。因為，口講係風，筆寫係蹤，這恁多个優秀作品，單淨口傳，可能會跌淨淨，係當打爽个事情。
    𠊎俚做毋得一直停在「客語」个階段，愛慢慢提升到「客文」个高度。因為「言之不文，行之不遠」，斯像這下，毋單淨有「華語」，還有更多个「華文」，所謂「世遠不見其面，看文斯知其心」，文章係萬古千秋个事情。客語文章，除了愛有一般文章个感性真情，運用客語能力熟絡以外，還愛有兜仔文化性，淡淡个歷史情境摎客家个韻味，一種十里飄香个感覺。

    這擺散文獎个作品，都有以上个特性，讀了以後，有一種醹醹个客家味，客家个真情，斯像轉到當時个情境共樣，毋單淨詩中有畫，文中也有畫。
    這擺閩客語文學獎个客語散文組，首先愛恭喜各位得獎者，實在難能可貴；優秀作品非常多，對遺珠之憾个朋友，還請大家能夠「紙角張鹽――愛包鹹(涵)」！

      以下係三位評審共同个感想：
    〈春櫻風情畫〉描寫櫻花盛開个情景，客語寫作能力已好，描寫景物幼秀入味，內容豐富。從交春時節，從屋面前个櫻花開始，到武陵農場看櫻花，再紹介各地櫻花，最尾尋著感動人个櫻花景色，係愛用心看正重要。文章脈絡分明，像抽繭牽絲共樣，有條有理，結構嚴謹，富有新意。全文書寫優雅自然，像鮮鮮流水，蓬蓬遠春共樣，自有韻味，注意部分用字詞彙个精確性。
    〈夢〉這篇文章思想層次高，客語能力已強，有關老屋个夢，有阿爸摎自家細人時節，共同生活个感情。年長月久，老屋崩壞，愛賣這有歷史个祖公業，係仰般無奈何个事情，正經像濛煙个一場夢共樣，深情遠韻，分人回味無窮。盡多看等會失傳个詞彙，在這位聲聲入耳，活跳如生，有歷史性、文化性摎知識性，內容豐富，全文書寫清順自然，像月明林下，流水行雲共樣，聲聲見心。
    〈在該搭山仔裡肚〉這篇文章客語能力熟絡自然，運用詞彙適合妥當，文學性盡高，像「樹殁忒咧，屋橫忒咧」，有風雲變幻，意在言外之感。「阿太過身前，同山仔賣忒」，雖然，人講「賣田毋敢田脣行」，但是，後代子孫還仰般个懷念該伙房屋，見擺經過該搭山仔裡肚，總會出現望啊望个毋盼得，一種仁者樂山，隱含弦外之音。全文書寫溫柔敦厚，情淰於山，情淰三代，滿哪仔都係淰淰个深情。

– – – – – – – – – – – – – – – – – – – – – – – – – – -《閱讀全文》