第二名 李敏忠 《日頭》

      為生活世界而寫，這是我知覺存在的方式。
      我佇2009年7月猶是博士候選人的時，捌參加財團法人陳文成博士紀念基金會舉辦的「我的31歲」續寫活動。彼時，透過這款的書寫，予我重新理解過去序大人對美麗島事件、林宅血案、陳文成命案憤怒的原因。對我來講，陳文成博士的命案不只「震動」著我；後來嘛變作我心智「衝撞」黨國意識型態的動力。如今《日頭》（2021.12）就是為「衝撞」寫的；希望用敘事詩寫這件命案，寫紀念廣場，寫我所理解的「轉型正義」。

      最後，我感謝評審對《日頭》的理解及顧愛。真多謝。

《作品賞析》

mài-khù及攝影機攏已經徙走

所有梳妝打扮的話語

攏走入一分三十秒的新聞   放送

數念你落落長的蟬聲拖著清醒的心情

那行   那看

看廣場的樹影一痕一跡

– – – – – – – – – – – – – – – – – – – – – – – – – – -《閱讀全文》

  第三名 賴政國 《淺拖仔》

      人生毋驚風湧，佮家己準做是男主角來搬。
      感激戰後足濟先進（林宗源、向陽、宋澤萊、路寒袖……）的開拓，佮教育部的拍拚，予咱臺語的文字推廣，漸漸會當看著貓霧仔光。雖然用字猶原無夠濟，頭前的路坎坎坷坷，咱逐家攏愛較拚勢咧，做伙為臺語文字做出貢獻。我上大的向望是咱臺語會當擺脫予人粗魯閣倯的印象，會當親像以早捌讀過蕭麗紅寫的《千江有水千江月》內底描寫的氣氛，是一個好禮、溫暖、充滿人情味的臺灣社會。落尾著愛感謝我的父母、家後、後生、朋友，𪜶是我靈感的來源。

《作品賞析》

囥佇壁角彼跡害去ê淺拖仔
頂懸印ê帆船尪仔誠孤單
伊ê幼秀跤跡
干焦猶閣咧佇海湧浮浮沉沉
親像愛人仔的輕聲細說
出帆了後毋捌踅頭

– – – – – – – – – – – – – – – – – – – – – – – – – – -《閱讀全文》

  第八屆教育部閩客語文學獎閩南語現代詩類教師組 評審感言

  撰稿:向陽

    第八屆閩客語文學獎臺灣閩南語現代詩教師組參選的作品，主題真多元，水準誠齊勻，競爭激烈，評審的過程欲比並好歹、鑑定懸低，嘛誠頭疼。三位評審經過討論、參詳，總是選出三篇著獎的作品。名次分別是：第一名〈斷章：聽，江文也〉、第二名〈日頭〉、第三名〈淺拖仔〉。

    第一名的作品〈斷章：聽，江文也〉，以詩人、作曲家江文也做主角，描寫江文也自少年到老，出生佇臺灣、出名佇日本、落魄佇中國的創作人生。這首詩用江文也人生的大事件做背景，透過伊寫的重要樂曲(《白鷺的幻想》、未完成的《阿里山的歌聲》)，寫出江文也一生的無奈佮對故鄉臺灣的數念。作者用「斷章」做題，譬喻江文也予時代作弄的破空人生；嘛運用「斷章」的形式佮技巧，透過10葩音樂短章，拼貼江文也的圖像，展現臺語詩的後現代手路，誠無簡單。

    第二名〈日頭〉，用臺大校園「陳文成事件紀念廣場」設置「紀念一位堅決抵抗國家暴力的勇者」矮牆做題材，重現1981年發生佇臺大校園的陳文成事件，表達對陳文成為臺灣民主奉獻的敬疼，是一首情感飽滇，閣有雅氣的好詩。作者先寫新聞放送的鏡頭，中央段寫陳文成事件的頭尾，落尾段收束佇日頭光，表達追思，結構齊備。另外，詩的用韻嘛誠自然，會當表達出敬疼勇者的感情。

    第三名〈淺拖仔〉，是一首描寫感情的詩作，作者「淺拖仔」譬喻男女之情的淺緣，掠準家己愛對方，對方嘛會感動，落尾卻是「煞戲」。這首詩的語言誠自然，用海湧浮沉佮駁岸戀情做對照，寫出熱戀煞鼓的無奈，語感真鮮沢。

– – – – – – – – – – – – – – – – – – – – – – – – – – -《閱讀全文》