第二名 傅詠婷 《早時敢會當較晏ê》

      你著愛知影你的喙舌頂有偌濟文化，彼攏是你的根、你的使命。
      感謝各位評審予我這擺機會，這是一篇實驗的散文，寫一个睏袂去的暝時，寫一个 siōnn 東 siōnn 西的暗暝，寫一个平凡無聊的我家己，凡勢會當無細膩予逐家有共鳴。我希望用臺語描寫上日常的生活，用臺語記錄每一个幼細的心情，用臺語來書寫未來的人生。

《作品賞析》

      總算是到厝矣。
      十二點十分，予捷運載轉來到你佇臺北稅ê厝，狹甲袂輸是咧關犯人ê，和窗仔門也無，遮是你家己ê空間。無閒 tshì-tshà 規工矣，竟然猶無法度直接歇睏。日時開會ê資料，新ê任務，也只有這个無人攪吵ê時陣，通好好仔整理，嘛無 siōnn 欲做工課ê奴才，只是身軀邊ê人攏遐認真，若無較拍拚- -eh，是會驚 hőng 見笑ê，歇睏ê時間只好kā放棄一寡，捏一下，泡一杯燒ê可可仔予家己啉，當做今仔日上尾一个工課ê動力。

– – – – – – – – – – – – – – – – – – – – – – – – – – -《閱讀全文》

  第三名 黃嘉甄 《三代情的腳踏車》

         成功是靠1分的運氣，閣加上99分的拍拚。

      代先，先感謝評審老師的肯定，予嘉甄佇未來對閩南語的寫作，會使有一份的信心佮向前行的力量，佇彼閩南語文學的領域當中，會當行著愈遠、愈闊。
      阿爸，我著獎矣，你敢有看著？你敢會為我歡喜？這是嘉甄對細漢甲大漢，頭一擺用閩南語字來書寫創作，用字方面攏是較簡單、較淺顯，就是一般的生活用字，因為較困難的，嘉甄嘛猶閣咧學習。
      逐工暗時綴著讀幼稚園的後生練習寫字，伊寫伊的國語生字；我寫我的閩南語生字，一筆一劃刻印佇咧頭殼內底，向望所講出來的話，攏會使先佇腦海浮現出相對應的字。

      閩南語字對我來講，有一種莫名的吸引力、有一種特殊的美感，唸起來特別有親切的感覺。

《作品賞析》

      這幾日拄仔好有閒，所以共我寶貝的冊做一下仔整理，因為我買一个新的冊櫃，伊囥咧壁角嘛有一暫仔矣，舊的冊櫃可能是因為溼氣佮冊的重量，已經有一寡仔歪腰去矣，來一个地動，伊凡勢著會崩去，我是按呢想的。

      我先共冊囥咧塗跤，一疊一疊的，我坐咧塗跤一本一本咧反，其實，我嘛毋知影，我為啥物，欲一本一本共掀，可能是我想欲揣著當初時，看這本冊彼時的情景，年歲大矣，著足容易會去懷念過去，想起較早的種種。
      這時，一張相片對一本冊落落來，這本冊是我國小查字典比賽的獎品，是阮阿爸送予我的安慰獎，這張相片是彩色的，毋過色水淡薄仔黃黃，相片內底的情景，是我讀國小彼時，阿爸咧教我按怎樣騎跤踏車。

– – – – – – – – – – – – – – – – – – – – – – – – – – -《閱讀全文》

  第八屆教育部閩客語文學獎閩南語散文類學生組 評審感言

  撰稿:廖振富

    這屆的「閩客語文學獎」，閩南語散文學生組參加比賽的作品總共有15件。算起來件數無算真濟，總是題材是真多元。除了一般khah捷看見(khuàinn)的懷舊、親情、鄉土以外，koh包括愛貓族、魔神仔、上班族茫茫渺渺的心境等等。評審委員對初選作品的共識真懸，經過逐家充分討論，最後選出的前三名作品是這三篇：

    第一名是〈故鄉ê山〉，這篇的主題是屬佇地方風土書寫，作品內面刻劃澎湖特殊的地理環境hām百姓佇這困苦的所在生存的生活智慧，描寫澎湖人培育各種農作物，像金瓜、番薯、菜瓜、塗豆、蘆筍等等。作品對遮的部份攏會當描寫kah真活，真幼路，也展現出對家鄉的深刻認捌，題材也予人感覺真新款。另外，作品語言的使用真扭掠真自然，讀起來真會當帶動讀者的興趣，也予人有知識性的滿足感，所以這篇作品得著評審一致的讚賞。
    第二名〈早時敢會當較晏的〉，題目充分展現作者的創意，描寫佇臺北食頭路的少年上班族的心聲。主角面對工課的壓力、現實人生的無力感，不時koh回顧生命的過往，雖罔對未來有講袂出喙的茫然，suah猶原認份面對現實生活，終其尾無選擇消沉hām逃避。內容跳脫『勵志』的思維，但是對心境的刻畫hām描畫，真真實、真予人感動。結構的安排，透過第二人稱的話語，順深夜時分的時間流逝，呈現出生活細節kap思想的飄忽交織，展現出成熟的技巧。

    第三名〈三代情的跤踏車〉，對題目一直到內容，lóng是真捷看見(khuàinn)的親情主題，毋是特殊的題材。所以會當入選前三名，上主要的原因，應該猶是佇這篇作品會當透過真活骨的故事內容，通來感動人。作者對細節真幼路的描寫，成功傳達出感動人的氛圍。這篇文章用跤踏車共三代的親情串連起來，刻劃阿爸對家己的疼痛、少女時期對朦朧的異性戀情的期待，最後以翁婿款款仔教後生學騎跤踏車來收尾，完整呈現出三代親情傳承的主題。

    總結來講，題材創新、語言運用扭掠，而且進一步會當展現文學的美感hām文字的藝術性，這攏是遮的作品會當出線的主要原因。

– – – – – – – – – – – – – – – – – – – – – – – – – – -《閱讀全文》